گورنر پنجاب کی گلگت کے طلبا کیلئے پنجاب کے میڈیکل و انجینئرنگ کالجز میں مواقع بڑھانے کی یقین دہانی

گلگت (اُردو پوائنٹ اخبارتازہ ترین - این این آئی۔ 04 جون2026ء) گورنر پنجاب سردار سلیم حیدر خان نے کہا ہے کہ ملک کی تعمیر و ترقی میں مغل برادری اہم کردار ادا کر رہی ہے اور وقت آ گیا ہے کہ یہ برادری ملکی سیاست میں بھی فیصلہ کن کردار ادا کرے۔ انہوں نے کہا کہ مغل برادری کا ووٹ بینک سیاسی جماعتوں کے لیے اہمیت اختیار کرے اور برادری کی اجتماعی قوت کو قومی ترقی کے لیے بروئے کار لایا جائے۔

انہوں نے ان خیالات کا اظہار گلگت میں مکابرہ ایسوسی ایشن گلگت بلتستان کے زیر اہتمام منعقدہ پہلی مغل کنونشن سے خطاب کرتے ہوئے کیا۔ گورنر پنجاب نے کہا کہ پہلی مرتبہ مغل برادری کی اس سطح کی یکجہتی دیکھ کر انہیں دلی مسرت ہوئی ہے اور یہ امر خوش آئند ہے کہ برادری مسلسل اتحاد و اتفاق کی جانب بڑھ رہی ہے۔

(جاری ہے)

تقریب میں آل پاکستان مغل ویلفیئر آرگنائزیشن کے چیئرمین حاجی عبدالروف، مکابرہ گلگت بلتستان کے چیئرمین عبدالخالق تاج، سینئر رہنما سلطان گولڈن، صوبائی حکومت کے ترجمان شبیر میر سمیت پنجاب، خیبرپختونخوا اور گلگت بلتستان کے مختلف اضلاع سے تعلق رکھنے والے افراد نے شرکت کی۔

گورنر پنجاب نے کہا کہ پنجاب کی طرز پر گلگت بلتستان میں بھی مغل برادری کی فلاح و بہبود کے لیے منصوبے شروع کیے جائیں گے۔ انہوں نے یقین دہانی کرائی کہ گلگت بلتستان کے طلبا کے لیے پنجاب کے میڈیکل اور انجینئرنگ کالجز میں نشستوں میں اضافے کے حوالے سے پالیسی کے مطابق اقدامات کیے جائیں گے۔انہوں نے گلگت بلتستان میں بطور گورنر پنجاب مغل برادری سے پہلی مرتبہ خطاب کو اپنے لیے اعزاز قرار دیتے ہوئے کہا کہ وہ پارٹی پالیسی کے دائرے میں رہتے ہوئے برادری کی ترقی اور فلاح کے لیے کردار ادا کرتے رہیں گے۔

اس سے قبل تقریب میں آمد پر گورنر پنجاب کا پرتپاک استقبال کیا گیا۔ مغل عمائدین نے انہیں پھولوں کے ہار پہنائے جبکہ شرکا نے خیرمقدمی نعروں کے ذریعے ان کا استقبال کیا۔ مکابرہ مغل ویلفیئر آرگنائزیشن کے چیئرمین عبدالخالق تاج نے سپاس نامہ پیش کرتے ہوئے معزز مہمانوں بالخصوص گورنر پنجاب کی شرکت پر شکریہ ادا کیا اور گلگت بلتستان میں مغل برادری کی فلاح و بہبود کے لیے مزید اقدامات کی ضرورت پر زور دیا۔

تقریب سے خطاب کرتے ہوئے شبیر میر نے گلگت بلتستان کے نوجوانوں کی معاشی بہتری کے لیے جدید ٹیکنالوجی پر مبنی فری لانسنگ پروگرام شروع کرنے کی ضرورت پر زور دیا۔ انہوں نے مختصر مدت میں تمام اضلاع سے تعلق رکھنے والے افراد کی بڑی تعداد میں شرکت کو خوش آئند قرار دیا۔تقریب کے اختتام پر گلگت بلتستان میں مغل برادری کی تاریخ پر مبنی مختلف تصانیف مہمانوں کو پیش کی گئیں، جبکہ مکابرہ مغل ویلفیئر آرگنائزیشن کے عہدیداروں نے مہمانوں کو روایتی ٹوپیاں بھی پہنائیں۔ شرکا نے اس کامیاب کنونشن کے انعقاد پر منتظمین عبدالخالق تاج، سلطان گولڈن، انجینئر محمد نواز خان اور دیگر عہدیداروں کی کاوشوں کو سراہا۔