ڈریپ کو آئی سی ایچ میں مبصر کا درجہ ملنا ایک تاریخی کامیابی ہے، وفاقی وزیر صحت

جمعہ 5 جون 2026 20:50

اسلام آباد (اُردو پوائنٹ اخبارتازہ ترین - این این آئی۔ 05 جون2026ء) ڈرگ ریگولیٹری اتھارٹی آف پاکستا ن (ڈریپ) کو انٹرنیشنل کونسل فار ہارمونائزیشن سے مبصر کا درجہ حاصل ہو گیا، یہ فیصلہ برازیل کے شہر ریو ڈی جنیرو میں منعقدہ 2 تا 3 جون کو آئی سی ایچ اسمبلی اجلاس کے دوران کیا گیا۔ترجمان وزارت صحت کے مطابق وفاقی وزیر صحت مصطفی کمال نے ڈریپ کو اس اہم سنگ میل پر مبارکباد دیتے ہوئے کہا کہ ڈریپ کو آئی سی ایچ میں مبصر کا درجہ ملنا ایک تاریخی کامیابی ہے، آئی سی ایچ ایک عالمی سطح کا فورم ہے۔

(جاری ہے)

مصطفی کمال نے کہا کہ دنیا کے بڑے ریگولیٹری ادارے اور صنعت مل کر ادویات کے معیار، حفاظت کو یقینی بنانے کے لیے رہنما اصول تیار کرتے ہیں، یہ پاکستان کے ریگولیٹری نظام کو عالمی معیار سے ہم آہنگ کرنے کی جانب ایک بڑا قدم ہے، یہ پیش رفت پاکستان کے فارماسیوٹیکل ریگولیٹری نظام کو عالمی معیار کے مطابق بنانے میں بڑا اقدام ہے۔ وفاقی وزیر نے کہا کہ ڈریپ کا عالمی سطح پر تسلیم کیا جانا ایک حوصلہ افزا پیش رفت ہے، اس پیش رفت سے پاکستان کے ریگولیٹری نظام کی صلاحیت اور ڈریپ کیں شفافیت اور کارکردگی بہتر ہوگی اور فارماسیوٹیکل نظام پر اعتماد میں اضافہ ہوگا۔