پاکستان ہاکی ٹیم ایف آئی ایچ پرو ہاکی لیگ میں شرکت کیلئے کراچی سے بیلجیئم پہنچ گئی

جمعرات 11 جون 2026 14:30

بیلجیئم (اُردو پوائنٹ اخبارتازہ ترین - این این آئی۔ 11 جون2026ء) پاکستان ہاکی ٹیم ایف آئی ایچ پرو ہاکی لیگ میں شرکت کیلئے کراچی سے بیلجیئم پہنچ گئی ،قومی ٹیم کا ایئرپورٹ پر پرتپاک استقبال کیا گیا، شیڈول کے مطابق پرو ہاکی لیگ کے مقابلے 13 سے 28 جون 2026 تک بیلجیم اور یوکے میں کھیلے جائیں گے۔یورپ کے اس اہم دورے کیلئے روانہ ہونے والے قومی ہاکی اسکواڈ کے آفیشلز میں قومی ٹیم کے ہیڈ کوچ کے فرائض اولمپین منظور الحسن انجام دے رہے ہیں جبکہ اولمپین خواجہ محمد جنید بطور منیجر ٹیم کے ہمراہ ہیں۔

ان کے علاوہ ویڈیو اینالسٹ سلطان اشرف اور فزیو تھراپسٹ فہد جاوید بھی آفیشلز کا حصہ ہیں۔قومی ٹیم میں شامل کھلاڑیوں میں گول کیپرز علی رضا اور وقار شامل ہیں،دیگر کھلاڑیوں میں زکریا حیات، عماد شکیل بٹ، عبدالمتین، محمد عماد، معین شکیل، رانا محمد ولید اشرف، غضنفر علی، محمد عبداللہ، احمد ندیم، ارشد لیاقت، عبدالمنان، افراز، بشارت علی، محمد ندیم خان، رانا عبدالوحید اشرف، ابوبکر محمود، ارباز احمد اور محمد حماد الدین انجم شامل ہیں،قومی ٹیم دورے کے دوران بیلجیم اور انگلینڈ میں مجموعی طور پر آٹھ اہم میچز کھیلے گی۔

(جاری ہے)

بیلجیم لیگ کے اختتام پر قومی ٹیم لندن روانہ ہوگی، جہاں انگلینڈ لیگ کے دوران 23 جون کو پاکستان کا روایتی حریف بھارت کے خلاف سب سے بڑا اور سنسنی خیز ٹکراؤ شیڈول ہے،یہ تمام میچز بین الاقوامی ہاکی شیڈول کے مطابق وقت پر کھیلے جائیں گے۔