نئی دلی،وزارت خارجہ کی بریفنگ نے آزاد جموںوکشمیرمیں بھارتی مداخلت کا پردہ چاک کردیا

آزاد جموں و کشمیر کے لیے نام نہاد بھارتی تشویش پروپیگنڈے کے سوا کچھ نہیں ہے،سیاسی تجزیہ کار

جمعرات 11 جون 2026 14:42

اسلام آباد(اُردو پوائنٹ اخبارتازہ ترین - این این آئی۔ 11 جون2026ء) بھارتی وزارت خارجہ کی حالیہ بریفنگ نے آزاد جموں و کشمیر میں بھارتی مداخلت کا پردہ چاک کر دیا ہے ۔ تجزیہ کاروں نے بریفنگ کو محض ایک پروپیگنڈہ قرار دیا ہے۔کشمیرمیڈیاسروس کے مطابق مودی حکومت کے بیانات اور گودی میڈیا کا واویلا اس بات کا پتہ دیتا ہے کہ بھارت پاکستان کو بدنام کرنے کا ایک گندا کھیل کھیل رہا ہے اور ملک کے اندرونی معاملات میں کھلم کھلا مداخلت کر رہا ہے۔

سیاسی تجزیہ کاروں نے کہا کہ آزاد جموں و کشمیر کے لیے نام نہاد بھارتی تشویش پروپیگنڈے کے سوا کچھ نہیں ہے۔ بھارت کا اصل مقصد کشیدگی اور بدامنی کو ہوا دینا اور سفارتی سطح پر اور اور گوڈی میڈیا مشینری کے ذریعے پاکستان مخالف بیانیہ تیار کرنا ہے۔

(جاری ہے)

انہوں نے مزید کہا کہ بھارت جو کچھ کر رہا ہے، وہ سراسر ایک معاندانہ کارروائی ہے جسکا مقصدآزاد جموں و کشمیر کو غیر مستحکم کرنا اور مقبوضہ جموں و کشمیر میں اپنے جرائم سے عالمی برادری کی توجہ ہٹانا ہے۔

بھارت آزاد جموں و کشمیر پر تبصرے کا کوئی قانونی یا اخلاقی جواز نہیں رکھتا۔ اس نے جموںوکشمیر کے ایک بڑے حصے پر فوجی طاقت کے بل پر قبضہ جما رکھا ہے اور وہ حق خود ارادیت کے مطالبے کی پاداش میں مقبوضہ جموں وکشمیر کے لوگوں کو بدترین مظالم کا نشانہ بنارہا ہے۔تجزیہ کاروں کا کہنا ہے کہ بھارت درحقیقت آزاد جموں و کشمیر میں عدم استحکام کا تاثر پیدا کرنا چاہتا ہے کیونکہ وہ مقبوضہ جموںوکشمیر میں جاری اپنی ریاستی دہشت کو چھپانے میں ناکام رہا ہے اور اسے اس حوالے سے عالمی سطح پر انتہائی خفت کا سامنا ہے۔