ایچ ای سی اعتراضات کے فوری حل اور نیشنل کمپٹینسی ٹیسٹ کی مؤثر تیاری یقینی بنائی جائے، وائس چانسلر خواتین یونیورسٹی

ملتان (اُردو پوائنٹ اخبارتازہ ترین - اے پی پی۔ 23 جون2026ء) خواتین یونیورسٹی کی وائس چانسلر پروفیسر ڈاکٹر سیدہ شاہدہ بتول نے کمپیوٹر سائنس پروگرامز کے حوالے سے ہائر ایجوکیشن کمیشن (ایچ ای سی) کی جانب سے اٹھائے گئے اعتراضات کو فوری اور مؤثر انداز میں دور کرنے اور طالبات کو نیشنل کمپٹینسی ٹیسٹ (این سی ٹی) سمیت دیگر تعلیمی جائزوں کے لیے بھرپور تیاری کرانے کی ہدایت کی ہے۔

انہوں نے کہا کہ تعلیمی معیار، شفافیت اور ریگولیٹری تقاضوں کی مکمل پاسداری یو نیورسٹی کی اولین ترجیح ہے۔ترجمان کے مطابق کمپیو ٹر سائنس پروگرامز سے متعلق ایک اہم اجلاس وائس چانسلر پروفیسر ڈاکٹر سیدہ شاہدہ بتول کی زیر صدارت منعقد ہوا، جس میں انسٹی ٹیوٹ آف کمپیوٹر سائنس اینڈ انفارمیشن ٹیکنالوجی کے فیکلٹی اراکین نے شرکت کی۔

(جاری ہے)

اجلاس میں ایچ ای سی کی جانب سے سامنے آنے والے اعتراضات، ان کے حل کے لیے آئندہ حکمت عملی، تدریسی معیار میں بہتری، نیشنل کمپٹینسی ٹیسٹ میں طالبات کی کارکردگی اور ادارہ جاتی پیش رفت کے مختلف پہلوؤں پر تفصیلی غور کیا گیا۔

اجلاس سے خطاب کرتے ہوئے وائس چانسلر نے ہدایت کی کہ ایچ ای سی کے ساتھ مستقل، مؤثر اور نتیجہ خیز رابطہ برقرار رکھا جائے تاکہ تمام اعتراضات بروقت دور کرتے ہوئے تعلیمی پروگرامز کے تسلسل کو یقینی بنایا جا سکے۔ انہو ں نے کہا کہ یونیورسٹی کسی بھی قسم کے تعلیمی یا انتظامی چیلنج سے نمٹنے کے لیے مکمل طور پر تیار ہے اور اعلیٰ معیار کی تعلیم کی فراہمی کے لیے ہر ممکن اقد ام اٹھایا جائے گا۔

پروفیسر ڈاکٹر سیدہ شاہدہ بتول نے اس بات پر زور دیا کہ طالبات کی تعلیمی کارکردگی بہتر بنانے کے لیے خصوصی تیاری کورسز، فوکسڈ اکیڈمک سیشنز، ورکشاپس اور موک ٹیسٹس کا باقاعدگی سے انعقاد کیا جائے۔ انہوں نے کہا کہ طالبات کی کارکردگی کا مسلسل جائزہ لیا جائے، ان کی تعلیمی کمزوریوں کی نشاندہی کی جائے اور ضرورت کے مطابق رہنمائی اور اکیڈمک سپورٹ فراہم کی جائے تاکہ وہ قومی سطح کے امتحانات میں نمایاں کامیابی حاصل کر سکیں۔

اجلاس میں مختلف تجاویز پیش کی گئیں جن میں تمام اہل طالبات کو قومی اور بین الاقوامی سطح کے تعلیمی مواقع فراہم کرنے، ان کی پیشہ ورانہ صلاحیتوں کو نکھارنے اور جدید تقاضوں سے ہم آہنگ تعلیم کی فراہمی پر زور دیا گیا۔ وائس چانسلر نے چیئرپرسن انسٹی ٹیوٹ آف کمپیوٹر سائنس اینڈ انفارمیشن ٹیکنالوجی کو ہدایت کی کہ اس سلسلے میں ہونے والی پیش رفت سے متعلق ہفتہ وار رپورٹ پیش کی جائے تاکہ جاری اقدامات کا باقاعدگی سے جائزہ لیا جا سکے۔

انہوں نے اس عزم کا بھی اعادہ کیا کہ یونیورسٹی آئندہ داخلوں میں تعداد کے بجائے معیار کو ترجیح دے گی اور صرف ایسی طالبات کو بہترین مواقع فراہم کیے جائیں گے جو تعلیمی میدان میں نمایاں صلاحیتوں کی حامل ہوں، تاکہ دی ویمن یونیورسٹی ملتان اعلیٰ تعلیمی معیار اور شاندار کار کردگی کی روایت کو مزید مستحکم کر سکے۔