سندھ یونائیٹڈ پارٹی کا تلہار اور راجو خانانی میں قومی کچہری پروگرام

بدین(اُردو پوائنٹ اخبارتازہ ترین - این این آئی۔ 29 جون2026ء) سندھ یونائیٹڈ پارٹی کی جانب سے سندھ کے مختلف اضلاع اور تعلقہ جات میں عوامی شعور بیدار کرنے کے سلسلے میں قومی کچہری پروگرام منعقد کیے جا رہے ہیں۔ اسی سلسلے میں تلہار اور راجو خانانی میں دو الگ الگ تقریبات کا انعقاد کیا گیا، جن میں تحریک بحالی آئین پاکستان کے رہنما اور سندھ یونائیٹڈ پارٹی کے مرکزی صدر سید زین شاہ اور دیکر پارٹی رہنماں نے سندھ کے وسائل، پانی کے مسئلے، جمہوری نظام اور عوامی مسائل پر اپنے خیالات کا اظہار کیا۔

تلہار میں منعقدہ قومی کچہری سے خطاب کرتے ہوئے سندھ یونائیٹڈ پارٹی کے رہنماں نے کہا کہ سندھ کے عوام کو اپنے حقوق اور وسائل کے تحفظ کے لیے متحد ہونا ہوگا۔ مقررین کا کہنا تھا کہ سندھ کی زراعت، پانی، معدنی وسائل اور این ایف سی ایوارڈ سمیت دیگر معاملات پر وفاقی پالیسیوں کے باعث سندھ کو مشکلات کا سامنا ہے۔

(جاری ہے)

رہنماں نے کہا کہ سندھ کے پانی کے مسئلے پر عوام کو آگاہ کیا جا رہا ہے، جبکہ نئے کینال منصوبوں کے حوالے سے سندھ کے عوام میں تشویش پائی جاتی ہے۔

ان کا کہنا تھا کہ سندھ کی زمینوں اور وسائل کے تحفظ کے لیے تمام سندھ دوست قوتوں کو عملی جدوجہد کرنا ہوگی۔ اس موقع پر سندھ یونائیٹڈ پارٹی کے مرکزی صدر سید زین شاہ کی قیادت میں فکری نشست کے عنوان سے پروگرام منعقد کیا گیا، جس سے خطاب کرتے ہوئے سید زین شاہ نے کہا کہ ملک کے موجودہ حالات تشویشناک ہیں اور غلط پالیسیوں کے باعث مسائل میں اضافہ ہوا ہے۔

انہوں نے کہا کہ سندھ سمیت دیگر صوبوں کے حقوق کے تحفظ کے لیے جدوجہد جاری رہے گی۔ سید زین شاہ نے کہا کہ سندھ قدرتی وسائل سے مالا مال صوبہ ہے، مگر اس کے باوجود بڑی تعداد میں لوگ بنیادی سہولیات سے محروم ہیں۔ انہوں نے پانی کے مسئلے پر بات کرتے ہوئے کہا کہ سندھ کے حصے کا پانی کم ہونے سے زرعی زمینوں کو نقصان پہنچنے کا خدشہ ہے اور سندھ کے عوام اپنے وسائل کے تحفظ کے لیے خاموش نہیں رہیں گے۔

انہوں نے کہا کہ انصاف کے بغیر کوئی ملک ترقی نہیں کر سکتا، اس لیے ضروری ہے کہ ملک کو انصاف اور مساوات کے اصولوں پر چلایا جائے۔ سندھ یونائیٹڈ پارٹی کے سینئر نائب صدر روشن برڑو نے خطاب کرتے ہوئے کہا کہ نوجوان سندھ کی خوشحالی کی ضمانت ہیں، انہیں سندھ کے بہتر مستقبل کے لیے اپنا کردار ادا کرنا ہوگا۔ اس موقع پر سندھ یونائیٹڈ پارٹی کے مرکزی نائب چیئرمین اور ضلع کونسل بدین کے رکن ایڈوکیٹ امیر آزاد پنہور نے بھی خطاب کیا اور کہا کہ سندھ کے مسائل کے حل کے لیے عوامی اتحاد اور جدوجہد ناگزیر ہے۔

این اے 222 سے سابق امیدوار میر حسین بخش ٹالپر نے کہا کہ سید زین شاہ کی سندھ کے مسائل پر جدوجہد سب کے سامنے ہے اور نوجوانوں کو سندھ کے حقوق کے لیے آواز بلند کرنے والوں کا ساتھ دینا چاہیے۔ امیر آزاد پنہور نے کہا کہ وہ سندھ کے مسائل کا درد لے کر عوام کے پاس آئے ہیں، سندھ کی خوشحالی کے لیے اتحاد اور مشترکہ جدوجہد ضروری ہے۔ پروگرام میں سندھ یونائیٹڈ پارٹی کے انفارمیشن سیکریٹری رمضان برڑو، ضلعی صدر دانش نور ، فیضان جمالی ، سمیت مرکزی، ضلعی اور مقامی قیادت نے بڑی تعداد میں شرکت کی اور تقریبات سے خطاب بھی کیا۔ پروگرام میں نوجوان اتحاد کے رہنما امین نظامانی نے استقبالیہ کلمات ادا کیے اور آنے والے مہمانوں کا شکریہ ادا کیا۔