ٴراولاکوٹ میں مبینہ پولیس کارروائی کی خبروں کی تردید، سوشل میڈیا پر منفی پروپیگنڈا گمراہ کن قرار

ہفتہ 4 جولائی 2026 20:19

مظفرآباد(اُردو پوائنٹ اخبارتازہ ترین - آن لائن۔ 04 جولائی2026ء) آزاد جموں و کشمیر پولیس نے راولاکوٹ میں جاری دھرنے کے حوالے سے سوشل میڈیا پر گردش کرنے والی مبینہ پولیس کارروائی، شیلنگ اور فائرنگ کی خبروں کو بے بنیاد اور گمراہ کن قرار دیتے ہوئے عوام سے صرف مستند ذرائع سے معلومات حاصل کرنے کی اپیل کی ہے۔ترجمان آئی جی آزاد جموں و کشمیر کے مطابق بعض شرپسند عناصر سوشل میڈیا پر راولاکوٹ احتجاج کے دوران مبینہ پولیس حملے اور فائرنگ سے متعلق من گھڑت پروپیگنڈا کر رہے ہیں، جس کا مقصد عوام میں بے چینی اور قانون نافذ کرنے والے اداروں کے خلاف بداعتمادی پیدا کرنا ہے۔

ترجمان نے واضح کیا کہ عیدگاہ دھرنے کے مقام پر پولیس یا دیگر قانون نافذ کرنے والے اداروں کی جانب سے کوئی کارروائی نہیں کی گئی، جبکہ سوشل میڈیا پر پھیلائی جانے والی متعدد ویڈیوز پرانی ہیں جنہیں موجودہ صورتحال سے جوڑ کر غلط تاثر دیا جا رہا ہے۔

(جاری ہے)

بیان میں کہا گیا کہ بعض عناصر عوامی عدم دلچسپی اور دھرنے میں شرکائ کی تعداد میں کمی کے بعد منفی پروپیگنڈے کے ذریعے صورتحال کو مختلف رنگ دینے کی کوشش کر رہے ہیں، تاہم ایسے مذموم عزائم کامیاب نہیں ہوں گے۔

ترجمان آئی جی نے شہریوں اور سوشل میڈیا صارفین سے اپیل کی کہ وہ ذمہ داری، تحمل اور قومی مفاد کو مدنظر رکھتے ہوئے کسی بھی خبر، تصویر یا ویڈیو کو شیئر کرنے سے قبل اس کی تصدیق ضرور کریں اور صرف مستند ذرائع سے جاری ہونے والی معلومات پر اعتماد کریں تاکہ گمراہ کن، نفرت انگیز یا اشتعال انگیز مہمات کا حصہ بننے سے بچا جا سکے۔ترجمان کے مطابق پولیس کی اولین ترجیح امن و امان کا قیام، قانون کی بالادستی اور شہریوں کے جان و مال کا تحفظ ہے۔ انہوں نے کہا کہ ہر شہری کے آئینی اور قانونی حقوق کا احترام کیا جاتا ہے اور تمام اقدامات قانون کے مطابق کیے جاتے ہیں۔