آسٹریلیا نے انگلینڈ کو شکست دیکر ساتویں مرتبہ ویمنز ٹی ٹوئنٹی ورلڈکپ کا تاج اپنے سر سجا لیا

لارڈز کے تاریخی میدان میں فائنل کا سنسنی خیز مقابلہ، بیتھ مونی اور فوبی لچفیلڈ کی جارحانہ بیٹنگ، نیٹ برنٹ کی نصف سنچری رائیگاں

ساجد علی پیر 6 جولائی 2026 00:00

آسٹریلیا نے انگلینڈ کو شکست دیکر ساتویں مرتبہ ویمنز ٹی ٹوئنٹی ورلڈکپ ..

لارڈز (اُردو پوائنٹ اخبارتازہ ترین۔ 05 جولائی 2026ء) کینگروز خواتین کرکٹ ٹیم نے ایک بار پھر دنیا پر اپنی حکمرانی ثابت کر دی، آسٹریلیا نے فائنل کے بڑے معرکے میں روایتی حریف انگلینڈ کو یکطرفہ مقابلے کے بعد 7 وکٹوں سے شکست دے کر ساتویں مرتبہ ویمنز ٹی ٹوئنٹی ورلڈکپ چیمپیئن بننے کا اعزاز اپنے نام کر لیا۔ تفصیلات کے مطابق فائنل میچ میں آسٹریلیا نے ٹاس جیت کر پہلے فیلڈنگ کرنے کا فیصلہ کیا اور میزبان انگلینڈ کو بیٹنگ کی دعوت دی، پہلے بیٹنگ کرتے ہوئے انگلینڈ کی ٹیم نے مقررہ 20 اوورز میں 4 وکٹوں کے نقصان پر 150 رنز بنائے، انگلینڈ کی جانب سے کپتان نیٹ برنٹ نے ذمہ دارانہ اننگز کھیلتے ہوئے 52 گیندوں پر ناقابلِ شکست 58 رنز اسکور کیے۔

آخری اوورز میں فریا کیمپ نے جارحانہ بیٹنگ کا مظاہرہ کیا اور محض 28 گیندوں پر 4 چوکوں اور 1 چھکے کی مدد سے 44 رنز کی ناقابلِ شکست اننگز کھیل کر ٹیم کا اسکور 150 تک پہنچایا، جب کہ آسٹریلوی ویمن بالرز نے فائنل کے پریشر میں بہترین بالنگ کا مظاہرہ کیا، آسٹریلیا کی جانب سے کم گارتھ، لوسی ہیملٹن، سوفی اور اینابیل نے عمدہ کارکردگی دکھاتے ہوئے ایک ایک کھلاڑی کو آؤٹ کیا۔

(جاری ہے)

151 رنز کا ہدف آسٹریلوی ٹیم نے انتہائی سنسنی خیز اور جارحانہ انداز میں صرف 3 وکٹوں کے نقصان پر 17.1 اوورز میں باآسانی حاصل کر لیا، آسٹریلیا کی اوپنر بیتھ مونی نے فائنل میچ میں شاندار کارکردگی دکھاتے ہوئے 49 گیندوں پر 64 رنز کی فتح گر نصف سنچری اسکور کی، ان کا بھرپور ساتھ فوبی لچفیلڈ نے دیا جنہوں نے 35 گیندوں پر 48 رنز کی برق رفتار اننگز کھیلی۔

اس شاندار اور تاریخی فتح کے ساتھ ہی آسٹریلوی ویمن کرکٹ ٹیم نے ساتویں مرتبہ ٹی ٹوئنٹی ورلڈکپ کی ٹرافی اٹھا کر کرکٹ کی دنیا میں اپنی دھاک بٹھا دی ہے، جبکہ میزبان انگلش ٹیم ہوم گراؤنڈ اور ہوم کراؤڈ کے سامنے فائنل ہارنے پر شدید مایوس دکھائی دی۔