دولت کے لالچ میں حقیقی بچوں نے باپ کو پاگل خانے بھجوادیا، لے پالک بیٹا بازیابی کیلئے عدالت پہنچ گیا

لاہور ہائیکورٹ کے معزز جج جسٹس فاروق حیدر کی جانب سے حبسِ بے جا کی اس درخواست پر سماعت کی گئی

ساجد علی جمعرات 9 جولائی 2026 12:00

دولت کے لالچ میں حقیقی بچوں نے باپ کو پاگل خانے بھجوادیا، لے پالک بیٹا ..

لاہور (اُردو پوائنٹ اخبارتازہ ترین۔ 09 جولائی 2026ء) لاہور ہائیکورٹ میں ایک ایسے کیس کی سماعت ہوئی ہے جس میں حقیقی بچوں نے جائیداد ہتھیانے کے لیے اپنے ہی والد کو زبردستی ذہنی مریضوں کے بحالی سینٹر میں داخل کروا دیا، تاہم ایک لے پالک بیٹے کی جانب سے عدالتِ عالیہ سے رجوع کرنے پر معمر شہری کو بازیاب کروا لیا گیا۔ کورٹ رپورٹر محمد اشفاق کے مطابق معمر شہری کے لے پالک بیٹے نے اپنے والد کی غیر قانونی قید اور زندگی کو لاحق خطرات کے پیشِ نظر لاہور ہائیکورٹ سے رجوع کیا اور اپنے باپ کو بازیاب کروانے کے لیے حبسِ بے جا کی درخواست دائر کی۔

دولت کی لاچ میں بچوں نے باپ کو ذہنی مریضوں کے بحالی سنٹر داخل کروا دیا

لے پالک بیٹا باپ کو بازیاب کروانے کے لیے لاہور ہائیکورٹ پہنچ گیا

جسٹس فاروق حیدر نے مغوی کو فوری بازیاب کروا کر رہا کرنے کا حکم دے دیا

حقیقی چوں نے اپنے والد کو ذہنی مریضوں کی بحالی سنٹر میں داخل کروا… pic.twitter.com/OTPlazKbIL
— Muhammad Ashfaq (@m__ashfaq) July 9, 2026

بتایا گیا ہے کہ درخواست گزار نے عدالت کے سامنے مؤقف اختیار کیا کہ معمر شہری کے حقیقی بچوں کو دولت کا لالچ اندھا کر چکا ہے، انہوں نے جائیداد کے چکر میں اپنے ہی سگے والد کو ذہنی مریض قرار دے کر ایک ذہنی مریضوں کے بحالی سینٹر میں زبردستی داخل کروا دیا ہے تاکہ وہ ان کی مرضی کے بغیر اپنی جائیداد کے فیصلے نہ کرسکیں۔

(جاری ہے)

معلوم ہوا ہے کہ لاہور ہائیکورٹ کے معزز جج جسٹس فاروق حیدر نے حبسِ بے جا کی اس درخواست پر فوری سماعت کی اور انتظامیہ کو سخت ہدایات جاری کرتے ہوئے عدالتِ عالیہ نے مغوی معمر شہری کو مذکورہ بحالی سینٹر سے فوری طور پر بازیاب کروا کر آزاد اور رہا کرنے کا باقاعدہ حکم جاری کردیا۔