گروپ ہیڈ ملٹی میڈیا اردو پوائنٹ شاہد نذیر چودھری کا ایم ایم ڈی سی کا دورہ، گردوں کے مریضوں کے لیے فلاحی خدمات کو سراہا

لاہور(اُردو پوائنٹ اخبارتازہ ترین۔ 09 جولائی 2026ء)  سینئر صحافی وگروپ ہیڈ ملٹی میڈیا اردو پوائنٹ  شاہد نذیر چوہدری  اور ایگزیکٹو پروڈیوسر سہیل چوہان  نے گزشتہ روز المکی المدنی ڈائیلیسس سینٹر (MMDC) کا خصوصی دورہ کیا، جہاں انہوں نے گردوں کے مریضوں کو فراہم کی جانے والی طبی سہولیات، ادارے کی کارکردگی اور مستقبل کے ترقیاتی منصوبوں کا تفصیلی جائزہ لیا۔

اس موقع پر ایم ایم ڈی سی کے چیئرمین ڈاکٹر محمد جمیل ، انتظامیہ اور کور کمیٹی کے اراکین نے معزز مہمانوں کا پرتپاک استقبال کیا اور انہیں ادارے کے قیام کے مقاصد، مشن، وژن اور فلاحی خدمات سے آگاہ کیا۔
ادارے کی انتظامیہ نے بریفنگ دیتے ہوئے بتایا کہ المکی المدنی ڈائیلیسس سینٹر  نومبر 2022 میں  المکی المدنی کمیونٹی ویلفیئر فاؤنڈیشن  کے زیرِ انتظام قائم کیا گیا، جس کا مقصد مشرقی لاہور میں ذیابیطس، ہائی بلڈ پریشر اور گردوں کے بڑھتے ہوئے امراض میں مبتلا مریضوں کو معیاری اور باوقار طبی سہولیات فراہم کرنا ہے۔

(جاری ہے)

بریفنگ میں بتایا گیا کہ ایم ایم ڈی سی ایک روایتی ڈائیلیسس سینٹر سے ترقی کرتے ہوئے اب ایک جامع رینل ہیلتھ کیئر ایکو سسٹم (Comprehensive Renal Healthcare Ecosystem) کی شکل اختیار کر چکا ہے، جہاں علاج، بیماری سے بچاؤ، بحالی، طبی تربیت اور کمیونٹی آگاہی کو ایک مربوط نظام کے تحت فروغ دیا جا رہا ہے۔
وفد کو ادارے کی نمایاں کامیابیوں سے بھی آگاہ کیا گیا، جن میں 26 فعال ڈائیلیسس مشینیں، روزانہ تین آپریشنل شفٹیں، 13 ہزار سے زائد ڈائیلیسس سیشنز، 200 سے زیادہ مستقل مریضوں کی دیکھ بھال، 20 ہزار سے زائد افراد کی مفت اسکریننگ اور 100 سے زائد کمیونٹی اسکریننگ کیمپس کا انعقاد شامل ہیں۔

اس کے علاوہ ادارے میں جدید الیکٹرانک میڈیکل ریکارڈ (EMR) سسٹم، ہیپاٹائٹس سی کے مریضوں کے لیے علیحدہ ڈائیلیسس یونٹ، نیفرولوجی، ویسکولر ایکسیس اور کڈنی ٹرانسپلانٹ فسیلیٹیشن جیسی خصوصی طبی خدمات بھی فراہم کی جا رہی ہیں۔
انتظامیہ نے مستقبل کے منصوبوں پر روشنی ڈالتے ہوئے بتایا کہ ڈائیلیسس مشینوں کی تعداد میں مزید اضافہ، ماہانہ ڈائیلیسس استعداد کو چار ہزار سیشنز تک بڑھانا، بچوں کے لیے خصوصی نیفرولوجی و ڈائیلیسس یونٹ، ایچ آئی وی، ایچ بی وی اور ایچ سی وی کے مریضوں کے لیے علیحدہ یونٹس، ایم ایم ڈی سی رینل ٹریننگ انسٹی ٹیوٹ، موبائل اسکریننگ یونٹس، مختلف علاقوں میں سیٹلائٹ ڈائیلیسس سینٹرز کے قیام اور 100 بستروں پر مشتمل جدید کڈنی کمپلیکس کا قیام ادارے کے اہم منصوبوں میں شامل ہے۔

دورے کے اختتام پر گروپ ہیڈ ملٹی میڈیا اردو پوائنٹ  شاہد نذیر چودھری  نے ایم ایم ڈی سی کی خدمات کو سراہتے ہوئے کہا کہ یہ ادارہ محض ایک ڈائیلیسس سینٹر نہیں بلکہ گردوں کے امراض کی تشخیص، علاج، بحالی اور روک تھام کے حوالے سے ایک مثالی فلاحی اور صحتِ عامہ کا مرکز بن چکا ہے۔ انہوں نے کہا کہ ایسے ادارے معاشرے کے لیے ایک قیمتی سرمایہ ہیں اور انہیں میڈیا، مخیر حضرات اور سماجی اداروں کی بھرپور سرپرستی اور تعاون حاصل ہونا چاہیے تاکہ زیادہ سے زیادہ مستحق مریض معیاری علاج سے مستفید ہو سکیں۔

اس موقع پر ایم ایم ڈی سی کی جانب سے شاہد نذیر چوہدری اور سہیل چوہان کو یادگاری شیلڈز پیش کی گئیں۔ بعد ازاں چیئرمین  ڈاکٹر محمد جمیل نے معزز مہمانوں کا شکریہ ادا کرتے ہوئے کہا کہ میڈیا کا مثبت کردار گردوں کے امراض سے متعلق عوامی آگاہی، بروقت تشخیص اور معیاری علاج کے فروغ میں نہایت اہم ہے، اور باہمی تعاون سے مزید مستحق مریضوں تک صحت کی سہولیات پہنچائی جا سکیں گی۔