غیر قانونی اسلحے کے خاتمے کا عالمی دن منایا گیا، ماہرین کا قانون کی حکمرانی اور عوامی تعاون پر زور

جمعرات 9 جولائی 2026 12:16

ْٹنڈوالہیار (اُردو پوائنٹ اخبارتازہ ترین - این این آئی۔ 09 جولائی2026ء) دنیا بھر کی طرح ٹنڈوالہیار میں بھی9 جولائی کو غیر قانونی اسلحے کے خاتمے سے متعلق آگاہی کا عالمی دن منایا گیا، جس کا مقصد غیر قانونی اسلحے کی خرید و فروخت، اسمگلنگ اور اس کے ذریعے ہونے والے جرائم کے خلاف عوام میں شعور اجاگر کرنا تھا۔اس موقع پر ماہرین نے کہا کہ غیر قانونی اسلحہ قتل و غارت، ڈکیتی، اغوا، دہشت گردی اور دیگر سنگین جرائم کے فروغ کا ایک بڑا سبب ہے، جس سے معاشرتی امن و امان اور شہریوں کا تحفظ شدید متاثر ہوتا ہے۔

انہوں نے زور دیا کہ غیر قانونی اسلحے کی ترسیل اور اسمگلنگ کی روک تھام کے لیے مؤثر قانون سازی، سخت نگرانی، جدید سرحدی نظام، اسلحے کا مکمل ریکارڈ اور عوامی تعاون ناگزیر ہے۔

(جاری ہے)

ان کا کہنا تھا کہ قانون نافذ کرنے والے اداروں کو اسلحے کی غیر قانونی نقل و حرکت کے خلاف مربوط کارروائیاں مزید مؤثر بنانا ہوں گی۔ماہرین نے اس بات پر بھی زور دیا کہ برآمد ہونے والے غیر قانونی اسلحے کو قانونی کارروائی مکمل ہونے کے بعد سرکاری نگرانی میں تلف کیا جانا چاہیے تاکہ وہ دوبارہ جرائم پیشہ عناصر کے ہاتھ نہ لگ سکے۔

انہوں نے کہا کہ نوجوان نسل کو اسلحہ کلچر سے دور رکھنا، برداشت، رواداری، امن اور قانون کی پاسداری کے فروغ کے لیے تعلیمی اداروں، سماجی تنظیموں، میڈیا اور والدین کو مشترکہ کردار ادا کرنا ہوگا۔ماہرین کے مطابق غیر قانونی اسلحے کے خاتمے سے متعلق عالمی دن اس عزم کی تجدید کا موقع فراہم کرتا ہے کہ اجتماعی ذمہ داری، مؤثر قانون نافذ کرنے، عوامی شعور اور باہمی تعاون کے ذریعے ہی ایک پرامن، محفوظ اور جرائم سے پاک معاشرہ تشکیل دیا جا سکتا ہے۔