وزیراعلی مریم نواز شریف کے مثالی گائوں پروگرام کے لئے ضلعی افسروں کو ذمہ داریاں تفویض

بدھ 22 جولائی 2026 12:51

لاہور (اُردو پوائنٹ اخبارتازہ ترین - این این آئی۔ 22 جولائی2026ء) وزیراعلی مریم نواز شریف کے مثالی گائوں پروگرام کے لئے ضلعی افسروں کو ذمہ داریاں تفویض کر دی گئی ہیں، متعلقہ اضلاع میں ڈسٹرکٹ آفیسر انفراسٹرکچر اینڈ سروسز (ڈی او آئی اینڈ ایس) ضلعی کوآرڈینیٹر مقرر کئے گئے ہیں۔ اس ضمن میں وزیر بلدیات پنجاب ذیشان رفیق کی زیر صدارت ڈی اوز آئی اینڈ ایس کا بذریعہ ویڈیو لنک اجلاس ہوا جس میں سیکرٹری لوکل گورنمنٹ شکیل احمد میاں، سپیشل سیکرٹری ایڈمن ارشد بیگ، سپیشل سیکرٹری لوکل گورنمنٹ شاہد زمان لک اور پنجاب رورل میونسپل سروسز کمپنی(پی آر ایم ایس سی) کے چیف ایگزیکٹو آفیسر خرم پرویز نے بھی شرکت کی۔

صوبائی وزیر نے ڈی اوز آئی اینڈ ایس کو ضروری ہدایات جاری کرتے ہوئے کہا کہ مثالی گائوں وزیراعلی مریم نواز شریف کا فلیگ شپ پروگرام ہے۔

(جاری ہے)

انہوں نے کہا کہ ضلعی سطح پر نگرانی کا میکانزم بننے سے ترقیاتی سکیموں کی موثر نگرانی ہوسکے گی۔ متعلقہ تحصیل میں سب انجنئیرز کو کوآرڈینیٹر کا اضافی چارج دیا جا رہا ہے جبکہ پی آر ایم ایس سی ڈویژن اور صوبائی سطح پر نگرانی کر رہی ہے۔

وزیر بلدیات نے سیکرٹری لوکل گورنمنٹ بورڈ کو باقاعدگی سے ڈی اوز آئی اینڈ ایس کی فالواپ میٹنگز کی ہدایت کرتے ہوئے زور دیا کہ کسی ترقیاتی سکیم میں معیار اور رفتار پر سمجھوتہ نہیں ہونا چاہیئے۔ انہوں نے کہا کہ پنجاب کی 10 ڈویژن کے 485 دیہات کو ماسٹر پلاننگ کے ذریعے مثالی بنایا جا رہا ہے۔ ذیشان رفیق نے سختی سے ہدایت کی کہ دیہات میں پہلے سے بنائی گئی گلیوں کو توڑنے سے گریز کیا جائے۔ انہوں نے کہا کہ مثالی گائوں منصوبہ ٹائم لائن کے مطابق آگے بڑھ رہا ہے۔ ضرورت اس امر کی ہے کہ کنٹریکٹرز کے کام کی مانیٹرنگ کی جائے تاکہ مطلوبہ اہداف کے حصول میں آسانی ہو۔