Live Updates

صرف ایک سال میں موبائل کال اور ڈیٹا پیکجز 33 فیصد تک مہنگے

پی ٹی اے کے اپ ڈیٹ شدہ ٹیرف کی تفصیلات میں تمام بڑی ٹیلی کام کمپنیوں کے ہائبرڈ اور ڈیٹا پیکجز مہنگے ہو چکے ہیں

ساجد علی بدھ 22 جولائی 2026 13:51

صرف ایک سال میں موبائل کال اور ڈیٹا پیکجز 33 فیصد تک مہنگے

اسلام آباد (اُردو پوائنٹ اخبارتازہ ترین۔ 22 جولائی 2026ء) پاکستان ٹیلی کمیونیکیشن اتھارٹی (پی ٹی اے) کی جانب سے جاری کردہ ٹیرف کے حالیہ اعداد و شمار سے پتہ چلا ہے کہ ملک کی ٹاپ ٹیلی کام کمپنیوں جاز، زونگ، یو فون اور ٹیلی نار نے اپنے موبائل کال اور ڈیٹا بنڈلز کی قیمتوں میں زبردست اضافہ کر دیا، صارفین کو ایک سال پہلے کی نسبت کچھ پیکجز پر 33 فیصد تک زائد رقم ادا کرنا پڑ رہی ہے۔

پرو پاکستانی کی رپورٹ کے مطابق پی ٹی اے کے اپ ڈیٹ شدہ ٹیرف کی تفصیلات میں تمام بڑی ٹیلی کام کمپنیوں کے ہائبرڈ اور ڈیٹا پیکجز مہنگے ہو چکے ہیں، جاز، زونگ، یو فون اور ٹیلی نار کے مختلف ماہانہ ہائبرڈ پیکجز کی قیمتوں میں 500 روپے تک کا بھاری اضافہ ہوا ہے، 15 دن کی مدت والے کچھ پیکجز اور بنڈلز کی قیمتوں میں 300 روپے تک کا اضافہ ریکارڈ کیا گیا، ہفتہ وار ہائبرڈ اور ڈیٹا بنڈلز کی قیمتیں بھی 130 روپے تک بڑھا دی گئی ہیں۔

(جاری ہے)

بتایا گیا ہے کہ صارفین کو آگاہی فراہم کرنے اور پیکجز کا آسانی سے موازنہ کرنے کے قابل بنانے کے لیے پی ٹی اے نے ایک اہم قدم اٹھایا ہے جس کے تحت پی ٹی اے نے ویب سائٹ پر ٹاپ 15 ہائبرڈ اور ڈیٹا بنڈلز کی الگ الگ قیمتیں، ان کی مدت اور سالانہ بنیادوں پر ہونے والے اضافے کی مکمل تفصیلات جاری کر دی ہیں تاکہ شہری اپنی ضرورت اور بجٹ کے مطابق بہترین اپشن کا انتخاب کر سکیں۔

بتایا جارہا ہے کہ پٹرولیم مصنوعات اور بنیادی اشیائے ضرورت کی قیمتوں میں مسلسل اضافے کے بعد موبائل فون سروسز کا مہنگا ہونا عام شہریوں بالخصوص طلباء اور آن لائن کام کرنے والے افراد پر مزید معاشی بوجھ بڑھا رہا ہے، پی ٹی اے کی رپورٹ نے ثابت کر دیا ہے کہ عوام پر ہر طرف سے مہنگائی کے بم برسائے جا رہے ہیں۔