عوام کو جدید، محفوظ اور کیش لیس سفری سہولت فراہم کرنے کیلئے eTransit Punjab ایپ اور ٹی کیش کارڈ متعارف

جمعہ 24 جولائی 2026 16:43

لاہور (اُردو پوائنٹ اخبارتازہ ترین - اے پی پی۔ 24 جولائی2026ء) وزیرِاعلی پنجاب مریم نواز شریف کے ویژن کے تحت پنجاب حکومت نے شہریوں کو جدید، محفوظ اور عالمی معیار کی سفری سہولیات فراہم کرنے کیلئےeTransit Punjab ایپ اور T-Cash کارڈ متعارف کرایا ہے۔پی آئی ٹی بی،ٹرانسپورٹ ڈیپارٹمنٹ اور پنجاب ماس ٹرانزٹ اتھارٹی کے تعاون سے متعارف کرایا گیا یہ جدید الیکٹرانک کرایہ وصولی نظام شہریوں کو T-Cash کارڈ اور موبائل ایپ کے ذریعے بغیر نقد رقم کے تیز،محفوظ اور آسان سفر کی سہولت فراہم کرتا ہے۔

eTransit Punjab اور T-Cash کارڈ کے ذریعے مسافر میٹرو بس، اور الیکٹرک بسوں پر ایک ہی ڈیجیٹل پلیٹ فارم کے ذریعے سفر کر سکتے ہیں،جس سے نقد رقم کی ضرورت اور ٹوکن کے حصول کیلئے قطاروں میں انتظار کرنے کی زحمت ختم ہو گئی ہے۔

(جاری ہے)

اس حوالے سے پی آئی ٹی بی چیئرمین فیصل یوسف کا کہنا تھا کہ eTransit Punjab ایپ اور T-Cash کارڈ پنجاب میں ڈیجیٹل ٹرانسپورٹ کے فروغ کی جانب اہم قدم ہے،جس کا مقصد شہریوں کو محفوظ، آسان اور جدید سفری سہولت فراہم کرنا ہے۔

پی آئی ٹی بی جدید ٹیکنالوجی کے ذریعے عوامی خدمات کو مزید موثر، شفاف اور عوام دوست بنانے کیلئے مسلسل اقدامات کر رہا ہے۔انہوں نے مزید کہا کہ یہ نظام نہ صرف شہریوں کے روزمرہ سفر کو زیادہ آسان بنائے گا بلکہ ڈیجیٹل ادائیگیوں کے فروغ، بہتر سروس ڈیلیوری اور سمارٹ گورننس کے قیام میں بھی اہم کردار ادا کرے گا۔ شہری eTransit Punjab ایپ کو Google Play Store اور Apple App Store سے مفت ڈاون لوڈ کر سکتے ہیں،جبکہ T-Cash کارڈ اور مزید معلومات www.etransit.punjab.gov.pk کے ذریعے حاصل کی جا سکتی ہیں۔