وفاقی تعلیمی بورڈ نے نہم و دہم کے سالانہ امتحانات برائے سال 2026 کے نتائج کا اعلان کر دیا

بدھ 29 جولائی 2026 22:56

اسلام آباد(اُردو پوائنٹ اخبارتازہ ترین - آن لائن۔ 29 جولائی2026ء) وفاقی تعلیمی بورڈ نے نہم و دہم کے سالانہ امتحانات برائے سال 2026 کے نتائج کا اعلان کر دیا، 10 میں سے 7 ٹاپ پوزیشن طالبات نے حاصل کیں جبکہ وفاقی سرکاری تعلیمی اداروں کا کوئی بھی طالبعلم پوزیشن حاصل نہ کرسکا۔نتائج کے حوالے سے منعقدہ تقریب کے مہمان خصوصی وفاقی وزیر تعلیم ڈاکٹر خالد مقبول صدیقی تھے۔

چیئرمین فیڈرل بورڈ نے نتائج کا اعلان کرتے ہوئے کہا کہ اس سال 292831 بچے امتحانات میں شامل رہے، نقل کے کل 86 کیسز رپورٹ ہوئے، کل 1006 امتحانی سنٹر بنائے گئے تھے، سپروائز سٹاف 2012 جبکہ انوجیلیٹر 6996 تعینات کئے گئے۔ان کا کہنا تھا کہ پیپرز کی چیکنگ کیلئے 4855 اساتذہ کی خدمات حاصل کی گئی، پیپرز چیکنگ کیلئے 10706 اساتذہ نے اپلائی کیا۔

(جاری ہے)

سائنس گروپ سے افیرا اعجاز نے 1089 نمبرز لیکر پہلی پوزیشن حاصل کی، آمنہ نعمان کی 1088 نمبرز کے ساتھ دوسری پوزیشن رہی، حذیفہ حیدر نے 1086 نمبرز کے ساتھ تیسری پوزیشن حاصل کی۔

اس موقع پر وفاقی وزیرتعلیم ڈاکٹر خالد مقبول صدیقی نے منعقدہ تقریب سے خطاب کرتے ہوئے کہا کہ آج کی تقریب میں آنا باعث خوشی ہے یہ وہ تقریب ہے جہاں سے کامیابیوں کا راستہ بنتا ہے، آج کی دنیا میں جس نے خود کو نہیں بدلا اسکو خدا بھی نہیں بدلتا۔ان کا کہنا تھا کہ آنے والے 40 سالوں میں دنیا اور زیادہ تبدیل ہو چکی ہوگی، علم مومن کی میراث ہے، اس میراث کو اپنی روایات سے ہم آہنگ کرتے ہوئے ہمیں آگے بڑھنا ہے۔