ایم ڈی کیٹ ٹیسٹ 2026،ایک لاکھ 38ہزار طلبہ نے رجسٹریشن کروا لی

جمعرات 16 جولائی 2026 17:03

لاہور(اُردو پوائنٹ اخبارتازہ ترین - این این آئی۔ 16 جولائی2026ء) ایم ڈی کیٹ 2026کے لئے ایک لاکھ 38ہزار طلبہ نے رجسٹریشن کروا لی۔ ذرائع کے مطابق میڈیکل اینڈ ڈینٹل کالجز میں داخلے کیلئے ایم ڈی کیٹ ٹیسٹ اتوار 16اگست کو صبح 10بجے ملک بھر میں بیک وقت ہو گا۔پنجاب میں ٹیسٹ کے انعقاد کی ذمہ داری یونیورسٹی آف ہیلتھ سائنسز لاہور کو تفویض کی گئی ہے ، سندھ میں سکھر آئی بی اے، خیبر پختونخوا ہ میں خیبر میڈیکل یونیورسٹی اوربلوچستان میں بولان یونیورسٹی آف میڈیکل اینڈ ہیلتھ سائنسز کوئٹہ کے سپردکی گئی ہے۔

اسلام آباد، کشمیر، جی بی میںٹیسٹ کے انعقادکی ذمہ داری شہید ذوالفقار علی بھٹو میڈیکل یونیورسٹی اسلام آباد کے سپردکی گئی ہے جبکہ سعودیہ میں یہ ذمہ داری بھی شہید ذوالفقار علی بھٹو میڈیکل یونیورسٹی اسلام آبادکو تفویض کی گئی ہے۔

(جاری ہے)

پی ایم ڈی سی کے مطابق بلوچستان کے طلبہ کیلئے اسلام آباد میں بھی ایم ڈی کیٹ ٹیسٹ سینٹر قائم کیا جائے گا،بولان یونیورسٹی آف میڈیکل سائنسز اسلام آباد میں اضافی ٹیسٹ سینٹر قائم کرے گی،اضافی امتحانی مرکز سے بلوچستان ڈومیسائل کے حامل امیدوار مستفید ہوں گے۔پی ایم ڈی سی کے مطابق ریگولر فیس کے ساتھ ایم ڈی کیٹ رجسٹریشن 13جولائی تک جاری رہی جبکہ لیٹ فیس کے ساتھ ایم ڈی کیٹ رجسٹریشن کی آخری تاریخ 18جولائی ہے۔