لاہور میں نجی سکولوں کو 10فیصد غریب بچوں کے مفت داخلے یقینی بنانے کا حکم

منگل 14 جولائی 2026 22:50

لاہور (اُردو پوائنٹ اخبارتازہ ترین - این این آئی۔ 14 جولائی2026ء) لاہور میں غریب بچوں کے تعلیمی حق کے نفاذ کے لئے ایجوکیشن اتھارٹی متحرک ہوگئی ،پرائیویٹ سکولوں کو 10فیصد غریب بچوں کے داخلوں کی رپورٹ جمع کرانے کا حکم دے دیا ۔ ڈسٹرکٹ ایجوکیشن اتھارٹی لاہور نے نجی سکولوں کو آخری وارننگ نوٹس جاری کردیا۔ایجوکیشن اتھارٹی نے کہا کہ ہر کلاس میں 10 فیصد محروم بچوں کے مفت داخلے یقینی بنائیں، نجی سکول 10فیصد کوٹے پر عملدرآمد کی تفصیلات 3دن میں جمع کرائیں۔

(جاری ہے)

غریب بچوں کے مفت داخلوں سے متعلق ڈیٹا نہ دینے والے سکولوں کے خلاف کارروائی کا عندیہ دے دیا گیا ۔ 10فیصد کوٹہ پورا نہ کرنے والے نجی سکول جرمانوں اور رجسٹریشن معطلی کے خطرے سے دوچار ہوگئے ۔ ایجوکیشن اتھارٹی کا پرائیویٹ سکولوں سے پسماندہ بچوں کے داخلوں کا ریکارڈ طلب کرلیا ۔ پنجاب فری اینڈ کمپلسری ایجوکیشن رولز 2024 پر سختی سے عملدرآمد کا حکم دے دیا ۔ نجی سکولوں کو 10فیصد مفت داخلوں کی تفصیلات سافٹ اور ہارڈ کاپی میں جمع کرانے کی ہدایت کردی ۔