سرکاری سکولوں کے طلبہ کیلئے یونیک آئی ڈی متعارف کرانے کا فیصلہ

جمعہ 31 جولائی 2026 23:06

لاہور(اُردو پوائنٹ اخبارتازہ ترین - آن لائن۔ 31 جولائی2026ء) محکمہ سکول ایجوکیشن پنجاب نے سرکاری سکولوں میں زیر تعلیم تقریباً ڈیڑھ کروڑ طلبہ کے لیے یونیک آئی ڈی جاری کرنے اور جدید یونیفائیڈ ڈیٹا سسٹم قائم کرنے پر کام شروع کر دیا ہے، جس کا مقصد طلبہ کا مکمل تعلیمی ریکارڈ محفوظ رکھنے اور انتظامی امور کو مزید مؤثر بنانا ہے۔محکمہ کے حکام کے مطابق نئے نظام کے تحت ہر طالب علم کو ایک منفرد شناختی نمبر (یونیک آئی ڈی) دیا جائے گا، جس کے ذریعے اس کی تعلیمی پیش رفت، پاس یا فیل ہونے کی معلومات، کلاس، عمر، صحت، رہائشی شہر اور دیگر بنیادی کوائف ایک ہی پلیٹ فارم پر دستیاب ہوں گے۔

حکام کا کہنا ہے کہ اگر کوئی طالب علم ایک سکول سے دوسرے سکول میں منتقل ہوتا ہے تو اس کی یونیک آئی ڈی برقرار رہے گی، جس سے اس کا مکمل تعلیمی ریکارڈ محفوظ رہے گا اور طلبہ کی ٹریکنگ بھی آسان ہو جائے گی۔

(جاری ہے)

سیکرٹری سکول ایجوکیشن مدثر ریاض کے مطابق بہتر انتظامی نظام، مؤثر نگرانی اور تعلیمی معیار کو مزید بہتر بنانے کے لیے یہ یونیفائیڈ ڈیٹا سسٹم متعارف کرایا جا رہا ہے۔

ان کا کہنا تھا کہ پہلے مرحلے میں سرکاری سکولوں کے تمام طلبہ کو یونیک آئی ڈی جاری کی جائے گی، جبکہ بعد ازاں پرائیویٹ تعلیمی اداروں کے طلبہ کے لیے بھی یونیک آئی ڈی کو لازمی قرار دیا جائے گا۔انہوں نے مزید بتایا کہ اس منصوبے پر عمل درآمد وزیراعلیٰ پنجاب کی منظوری کے بعد مرحلہ وار شروع کیا جائے گا، جس سے صوبے میں تعلیمی ڈیٹا کے مؤثر انتظام اور طلبہ کی نگرانی کے نظام میں نمایاں بہتری آئے گی۔