فتنہ الہندوستان کی سفاکیت کی انتہا،تربت سے اغوا6غیرمقامی مزدور وں کوبیدردی سے شہید کر دیا

جمعرات 30 جولائی 2026 23:16

کوئٹہ (اُردو پوائنٹ اخبارتازہ ترین - آن لائن۔ 30 جولائی2026ء) بلوچستان کے علاقہ کیچ ناصر آباد میں غیرمقامی مزدورایک بار پھر فتنہ الہندوستان کی بربریت کاشکار ہوگئے۔ دہشتگردوں نے چھ غیرمقامی مزدور وں کو اغواہ کے بعد بیدردی سے شہید کردیا ۔تفصیلات کے مطابق حکام کا کہنا ہے کہ فتنہ الہندوستان کے دہشتگردوں نے 27جولائی کو کیچ ،ناصرآباد میں غیرمقامی مزدورجاوید کو شہید جبکہ 6مزدوروں کو اغوا کیا تھاسفاک دہشت گردوں نے اغوا کئے جانے والے تمام 6غیر مقامی مزدوروں کو بھی گذشتہ روز بیدردی سے شہید کردیا۔

شہید مزدوروں میں محمد ارشد،محمد تیمور،محمد پرویز،محمدوزیر،محمد امجد اور محمد یحییٰ شامل ہیں۔ شہید کئے جانے والے مزدوروں میں سے 4کا تعلق پنجاب اور 2کا تعلق خیبر پختونخواہ سے تھا۔

(جاری ہے)

اس کے علاوہ کچھ روز پہلے بلوچستان کے علاقے ماشکیل میں بھی 5 غیر مقامی مزدوروں کو بھی شہید کیا گیا تھا۔ یہ تمام مزدور بلوچستان میں ترقیاتی منصوبوں پر کام کر کے علاقے کی تعمیر و ترقی میں کردار ادا کر رہے تھے۔

دہشت گردوں نے مزدوروں کو بے رحمی سے نشانہ بنا کر نہ صرف معصوم جانیں چھین لیں بلکہ بلوچستان کی ترقی اور عوام کے روزگار پر بھی حملہ کیا۔ یہ واقعہ ایک بار پھر ثابت کرتا ہے کہ فتنہ الہندوستان کے دہشت گرد نہتے مزدوروں، عام شہریوں اور بلوچستان کے امن و ترقی کے دشمن ہیں۔ ماہرین کا کہنا ہے کہ فتنہ الہندوستان کے دہشت گرد سیکیورٹی فورسز کی بھرپورکارروائیوں سے پسپا ہوکراب معصوم نہتے شہریوں کونشانہ بنارہے ہیں ۔