صوابی ،بجلی مسائل ،جی ایم تربیلا نے چیف پیسکو کو فوری اقدامات کیلئے خط ارسال کردیا

عوام کو بجلی بحران سے نجات دلانے کیلئے فوری اقدامات کا اٹھانے کا مطالبہ

منگل 4 اگست 2026 19:35

صوابی (اُردو پوائنٹ اخبارتازہ ترین - این این آئی۔ 04 اگست2026ء) صوابی میں بجلی کے مسائل کے خلاف عوامی احتجاج کے بعد اہم پیش رفت سامنے آئی ہے۔ جنرل منیجر (پاور)واپڈا تربیلا نے چیف ایگزیکٹو آفیسر پیسکو کو خط ارسال کرتے ہوئے صوابی اور ٹوپی کے عوام کو درپیش بجلی کے مسائل ترجیحی بنیادوں پر حل کرنے کے لیے فوری اقدامات کی درخواست کی ہے۔پی ٹی آئی ضلع صوابی کی قیادت میں رائٹ بینک کالونی گیٹ پر ہونے والے احتجاج میں غیر اعلانیہ اور طویل لوڈشیڈنگ، اوور بلنگ، کم وولٹیج، خراب ٹرانسفارمرز، بوسیدہ بجلی لائنوں اور دیگر مسائل کے خلاف آواز بلند کی گئی تھی۔

جنرل منیجر واپڈا تربیلا کے خط میں چیف پیسکو پر زور دیا گیا ہے کہ غیر اعلانیہ اور فورس لوڈشیڈنگ، کم وولٹیج، ٹرانسفارمرز کی مرمت و تبدیلی میں تاخیر، بوسیدہ بجلی لائنوں اور دیگر عوامی شکایات کا فوری نوٹس لیتے ہوئے موثر اقدامات کیے جائیں۔

(جاری ہے)

خط میں کہا گیا ہے کہ تربیلا رائٹ بینک کالونی حساس ریڈ زون اور کیٹیگری اے سیکیورٹی ایریا ہے، جبکہ صوابی کے بجلی سے متعلق مسائل پیسکو کے دائرہ اختیار میں آتے ہیں، اس لیے عوامی مشکلات کا فوری ازالہ ناگزیر ہے۔

پی ٹی آئی ضلع صوابی نے اپنے بیان میں مقف اختیار کیا کہ یہ پیش رفت اس بات کا ثبوت ہے کہ عوام جب اپنے جائز حقوق کے لیے متحد ہو کر پرامن احتجاج کرتے ہیں تو متعلقہ ادارے مسائل کے حل کے لیے عملی اقدامات پر مجبور ہوتے ہیں۔بیان میں مزید کہا گیا کہ پی ٹی آئی ضلع صوابی عوام کے بنیادی حقوق کے تحفظ اور بجلی کے مسائل کے مستقل حل کے لیے اپنی جدوجہد جاری رکھے گی، جبکہ متعلقہ اداروں کی جانب سے کیے گئے وعدوں اور اقدامات پر عملدرآمد کو یقینی بنانے کے لیے بھی اپنا کردار ادا کرے گی۔