کمشنر سکھر کے فلور ملزم پر چھاپے ، گندم کی 20 ہزار بوریاں برآمد

پیر 10 اگست 2026 21:09

سکھر (اُردو پوائنٹ اخبارتازہ ترین - اے پی پی۔ 10 اگست2026ء) کمشنر سکھر ڈویژن عابد سلیم قریشی نے روہڑی فلور مل اور سائٹ ایریا میں قائم انصاف رائس مل پر چھاپہ مار کر چھاپوں کے دوران گندم کی 20 ہزار ذخیرہ بوریاں برآمد کر کے ضبط کرلی گئیں ۔ کمشنر سکھر نے منتقلی کے عمل کی خود نگرانی کی۔

(جاری ہے)

اس موقع پر گفتگو کرتے ہوئے کمشنر سکھر ڈویژن عابد سلیم قریشی نے کہا کہ گندم اور آٹے کی دستیابی، سرکاری نرخوں پر فروخت اور ذخیرہ اندوزی کی روک تھام کے لیے ہر ممکن اقدامات کیے جائیں گے،کسی بھی تاجر کو گندم ذخیرہ کرنے کی ہرگز اجازت نہیں دی جائے گی۔

انہوں نے کہا کہ سندھ حکومت کی ہدایات پر گندم کی ذخیرہ اندوزی کے خلاف مؤثر کارروائیاں جاری ہیں جن کے مثبت نتائج سامنے آ رہے ہیں۔ کارروائیوں کے نتیجے میں مارکیٹ میں گندم کی قیمتوں میں نمایاں کمی آئی ہے جبکہ اس کا فائدہ عوام تک پہنچانے کے لیے ضروری ہے کہ آٹا بھی سرکاری طور پر مقرر کردہ نرخوں پر فروخت کیا جائے ۔