مقبوضہ مغربی کنارے میں آبادکاری علاقے کے شمالی اور جنوبی حصوں کے درمیان رابطہ منقطع کر دے گی، سیکرٹری جنرل اقوام متحدہ

جمعرات 20 اگست 2026 11:02

اقوام متحدہ (اُردو پوائنٹ اخبارتازہ ترین - اے پی پی۔ 20 اگست2026ء) اقوام متحدہ کے سیکرٹری جنرل انتونیو گوتریس نے مقبوضہ مغربی کنارے میں نئی غیر قانونی اسرائیلی چوکیوں کے قیام کی اطلاعات پر گہری تشویش کا اظہار کرتے ہوئے اسرائیل سے مطالبہ کیا کہ وہ اس حوالے سے مزید اقدامات سےگریز کرے۔ شنہوا کے مطابق اقوام متحدہ کے سربراہ کے ترجمان سٹیفن دوجارک نے گزشتہ روز روزانہ کی پریس بریفنگ کے دوران کہا کہ اقوام متحدہ کے سیکرٹری جنرل کو خاص طور پر مقبوضہ مغربی کنارے میں آبادکاری سے متعلق پیش رفت پر تشویش ہے، جو مغربی کنارے کے شمالی اور جنوبی حصوں کے درمیان رابطہ منقطع کر دے گی۔

ترجمان نے کہا کہ اس کے نتیجے میں مقبوضہ فلسطینی علاقے کی علاقائی سالمیت پر سنگین اثرات مرتب ہوں گے اور دو ریاستی حل کے لیے وجودی خطرہ پیدا ہوگا۔

(جاری ہے)

انہوں نے کہا کہ اقوام متحدہ کے سیکرٹری جنرل نے اسرائیل پر زور دیا ہے کہ وہ اس معاملے میں مزید اقدامات سے گریز کرے اور اقوام متحدہ کی متعلقہ قراردادوں کے مطابق 19 جولائی 2024 کے عالمی عدالتِ انصاف کے مشاورتی فیصلے کی روشنی میں عمل درآمد کرے۔

عالمی عدالتِ انصاف نے اپنے مشاورتی فیصلے میں قرار دیا تھا کہ مقبوضہ فلسطینی علاقے میں اسرائیل کی مسلسل موجودگی غیر قانونی ہے۔ عدالت نے کہا تھا کہ اسرائیل کو اس موجودگی کا جتنی جلد ممکن ہو خاتمہ کرنا چاہیے، نئی آبادکاری کی تمام سرگرمیاں فوری طور پر روکنی چاہئیں، تمام آبادکاروں کو وہاں سے نکالنا چاہیے اور اپنی کارروائیوں سے ہونے والے نقصانات کا ازالہ کرنا چاہیے۔