تربیتی کورسز پولیس افسران کو پیشہ ورانہ طور پر مزید مضبوط بنانے میں اہم کردار ادا کرتے ہیں،آرپی اوہزارہ ناصر محمود ستی

ایبٹ آباد (اُردو پوائنٹ اخبارتازہ ترین - اے پی پی۔ 21 اگست2026ء) ریجنل پولیس آفیسر ہزارہ ناصر محمود ستی نےسکول آف انٹیلی جنس ایبٹ آباد میں 20ویں ایڈوانس کورس مکمل کرنے والے پولیس افسران کے اعزاز میں منعقدہ تقریب میں بطور مہمان خصوصی شرکت کی، افسران سے خطاب اور سرٹیفکیٹ بھی تقسیم کئے۔ اس موقع پرڈائریکٹر سکول آف انٹیلی جنس ایبٹ آبادعارف جاوید، دیگر پولیس افسران، کورس کے منتظمین اور تربیتی عملہ موجود تھے۔

ڈی آئی جی ہزارہ نے اپنے خطاب میں کہا کہ موجودہ دور میں جرائم کی نوعیت میں تیزی سے تبدیلی آرہی ہے، جس کے پیش نظر پولیس افسران و جوانوں کے لیے جدید تفتیشی طریقہ کار، انٹیلی جنس بیسڈ پولیسنگ، معلومات کے تجزیے اور جدید ٹیکنالوجی سے استفادہ کرنے کی صلاحیتوں میں اضافہ ناگزیر ہے۔

(جاری ہے)

ایسے تربیتی کورسز پولیس افسران کو پیشہ ورانہ طور پر مزید مضبوط بنانے میں اہم کردار ادا کرتے ہیں۔

کورس کے دوران آپ کو جو کچھ سیکھنے اور سمجھنے کا موقع ملا ہے، اسے صرف تربیتی سرگرمی تک محدود نہ رکھیں بلکہ اپنی عملی و پیشہ ورانہ زندگی میں بھرپور انداز میں بروئے کار لائیں۔ آپ کی حاصل کردہ مہارتیں نہ صرف آپ کی انفرادی کارکردگی بلکہ پوری پولیس فورس کی استعدادِ کار میں بہتری کا باعث بن سکتی ہیں۔ ملک و قوم کی خدمت، عوام کے جان و مال کا تحفظ اور امن و امان کا قیام اپنا اولین مقصد بنائیں۔

بروقت اور درست معلومات کا حصول، ان کا تجزیہ اور متعلقہ افسران تک بروقت ترسیل جرائم کی روک تھام، جرائم پیشہ عناصر کے خلاف مؤثر کارروائی اور امن و امان کے قیام میں معاون ثابت ہوتی ہے۔ انہوں نے افسران پر زور دیا کہ وہ اپنے فرائض کی انجام دہی میں پیشہ ورانہ ذمہ داری، دیانت داری اور فرض شناسی کو ہمیشہ مقدم رکھیں۔انہوں نے کہا کہ خیبرپختونخوا پولیس انسپکٹر جنرل آف پولیس ذوالفقار حمید کے احکامات کے مطابق اپنے افسران اور جوانوں کی پیشہ ورانہ صلاحیتوں کو مزید اجاگر کرنے اور انہیں جدید پولیسنگ کے تقاضوں سے ہم آہنگ کرنے کے لیے مختلف نوعیت کے تربیتی و پیشہ ورانہ کورسز کا انعقاد کر رہی ہے۔

ان تربیتی پروگراموں کے ذریعے پولیس اہلکاروں کو جدید تکنیکوں، پیشہ ورانہ مہارتوں اور بدلتے ہوئے سکیورٹی چیلنجز سے نمٹنے کے لیے تیار کیا جا رہا ہے، جس کے نتیجے میں پولیس کے کام میں مزید بہتری اور ادارے کی مجموعی استعدادِ کار میں اضافہ ہو رہا ہے۔آخر میں ڈی آئی جی ہزارہ نے کورس کے شرکاء کو کامیابی سے تربیت مکمل کرنے پر مبارکباد پیش کی اور امید ظاہر کی کہ وہ اپنی پیشہ ورانہ ذمہ داریاں مزید بہتر انداز میں انجام دیتے ہوئے خیبرپختونخوا پولیس کے وقار میں اضافہ اور عوام کے تحفظ و خدمت میں بھرپور کردار ادا کریں گے۔