حکومت کی تاریخ دھوکوں سے بھری پڑی ہے، عدالتی حکم کے باوجود عمران خان کو شفاء ہسپتال منتقل نہیں کیاگیا، علامہ راجہ ناصر عباس

جمعہ 21 اگست 2026 20:05

اسلام آباد (اُردو پوائنٹ اخبارتازہ ترین - این این آئی۔ 21 اگست2026ء) سینیٹ میں قائد حزب اختلاف علامہ راجہ ناصر عباس نے کہا کہ سپریم کورٹ کے فیصلے کے باوجود بانی پی ٹی آئی عمران خان کو ہسپتال منتقل نہیں کیا گیا۔پارلیمنٹ ہائوس میں مشترکہ پریس کانفرنس میں علامہ راجہ ناصر عباس نے حکومت پر تنقید کرتے ہوئے کہا کہ دھوکا دیا گیا، ان کی تاریخ دھوکوں سے بھری پڑی ہے، عمران خان کی بہن کو الگ رکھا، ڈاکٹر فیصل سلطان کو شفا انٹرنیشنل ہسپتال لے گئے، یہ واحد جماعت ہے جس نے سپریم کورٹ پر بھی حملہ کیا تھا، علامہ راجہ ناصر عباس نے کہا کہ جو فیصلہ ان کی مرضی کے خلاف آئے یہ اس کو نہیں مانتے۔

قومی اسمبلی میں اپوزیشن لیڈر محمود خان اچکزئی نے کہا چاہتے ہیں پارلیمنٹ آزاد ہو، رات کو میڈیا نے بتایا کہ بانی کو ہسپتال پہنچا دیا گیا ہے تو ہم خوش ہوئے لیکن رات کے اندھیرے میں کس نے کیا کیا ۔

(جاری ہے)

چیئرمین پی ٹی آئی بیرسٹر گوہر نے کہاکل رات کو جو کچھ ہوا اس کا اندازہ نہیں تھا،کوئی تو ہے جو ملک میں سیاست کو مستحکم نہیں ہونے دے رہا،کوئی تو ہے جو ہمیں سڑکوں پر آنے پر مجبور کر رہا ہے، پی ٹی آئی کا آئندہ کا لائحہ عمل جلد دیا جائے گا۔

سیکرٹری جنرل پی ٹی آئی سلمان اکرم راجہ نے کہا ہم نے توہین عدالت نہیں کی، میڈیکل بورڈ تشکیل ہی نہیں پایا، شفا انٹرنیشنل اسپتال لے جایا ہی نہیں گیا، بانی پی ٹی آئی کے ساتھ سازش کی جارہی ہے، سپریم کورٹ نے پھر حکم دیا انہوں نے نہ مانا تو عوام کو ہی فیصلہ کرنا ہے ، اسی طرح بڑھناہے یا فیصلہ سڑکوں پر کرنا ہے۔