پمز ہسپتال میں جعلی ڈاکٹر بن کر ڈیوٹی کرنے والا نوجوان پکڑا گیا

مشکوک شخص وارڈ ایریا میں بطور ڈاکٹر ڈیوٹی کر رہا تھا، ملزم کے قبضے سے میڈیکل آفیسر کی جعلی سٹیمپ برآمد، ملزم کو تھانہ کراچی کمپنی پولیس کے حوالے کر دیا گیا

ساجد علی جمعرات 3 ستمبر 2026 17:01

پمز ہسپتال میں جعلی ڈاکٹر بن کر ڈیوٹی کرنے والا نوجوان پکڑا گیا

اسلام آباد (اُردو پوائنٹ اخبارتازہ ترین۔ 03 ستمبر 2026ء) اسلام آباد کے سب سے بڑے سرکاری ہسپتال پاکستان انسٹیٹیوٹ آف میڈیکل سائنسز (پمز) میں ایک جعلی ڈاکٹر ہسپتال کے وارڈز اور ایمرجنسی ایریا میں ڈیوٹی سرانجام دیتے ہوئے پکڑا گیا۔ اطلاعات کے مطابق پمز ہسپتال میں ایک مشکوک شخص کو وارڈز اور ایمرجنسی کاؤنٹر کے قریب ڈاکٹر کے طور پر کام کرتے دیکھا گیا، ہسپتال کے عملے اور سیکورٹی کو شک ہونے پر جب اس سے پوچھ گچھ اور چیکنگ کی گئی تو وہ کوئی معتبر میڈیکل ڈگری یا دستاویزات پیش نہ کر سکا اور وہ جعلی ڈاکٹر نکلا جس کے بعد موقع پر موجود سیکورٹی اور انتظامیہ نے فوری کارروائی کرتے ہوئے ملزم کو حراست میں لے لیا اور کراچی کمپنی پولیس کو اطلاع دی، تھانہ کراچی کمپنی پولیس نے واقعے کا مقدمہ درج کرلیا۔

(جاری ہے)

پمز ہسپتال میں جعلی ڈاکٹر بن کر ڈیوٹی کرنے والا نوجوان گرفتار،مشکوک شخص وارڈ ایریا میں ڈاکٹر کے طور پر ڈیوٹی سرانجام دے رہا تھا، چیکنگ پر جعلی ڈاکٹر نکلا
ملزم مظہر منظو کے قبضے سے سٹیتھوسکوپ اور جعلی میڈیکل آفیسر کی سٹیمپ برآمد ملزم کو تھانہ کراچی کمپنی پولیس کے حوالے کر دیا گیا pic.twitter.com/2RDd9G1byb
— Fouzia Ali (@fouziazaib) September 2, 2026

ایف آئی آر میں کہا گیا ہے کہ ملزم کی شناخت مظہر منظور ولد منظور احمد سکنہ نیلم ویلی ضلع مظفر آباد کے طور پر ہوئی ہے، ملزم کے قبضے سے ایک ڈاکٹر والا سٹیتھوسکوپ، ایک ڈاکٹر والا سٹچ اور ایک جعلی ڈاکٹر کی میڈیکل آفیسر سٹیمپ برآمد کرلی گئی، ملزم مظہر منظور کے خلاف تھانہ کراچی کمپنی میں مقدمہ نمبر 787/26 کے تحت تعزیراتِ پاکستان کی سنگین دفعات 170، 419، 420، 468 اور 471 درج کرلیا گا۔

اصل کمال کی بات ہے کہ پمز ہسپتال میں پیسے دے کر ایک جعلی ڈاکٹر ڈیوٹی کرتا رہا اور کسی کو کانوں کان خبر تک نہ ہوئی۔ پکڑے جانے کے بعد پولیس کے حوالے کر دیا گیا۔

سوال یہ ہے کہ جعلی ڈاکٹر پکڑے جانے پر کارروائی تو ہو گئی، لیکن اتنے عرصے تک اسے ڈیوٹی دینے کی اجازت کس کی نااہلی اور… pic.twitter.com/Aoh9Dv8a98
— Wajahat Sami (@Wajahat_PTI_) September 2, 2026

پولیس حکام کا کہنا ہے کہ ملزم کے خلاف باقاعدہ تفتیش شروع کردی گئی ہے اور اس بات کا تعین کیا جا رہا ہے کہ ملزم کتنے عرصے سے ہسپتال میں یہ جعلسازی کر رہا تھا اور کیا اس کے ساتھ کوئی دیگر سہولت کار بھی شامل ہے یا نہیں۔