جموں و کشمیر، سی آر پی ایف کی 21مقامات پر فوج کی مدد کیلئے تعیناتی کی تیاریاں

منگل 8 ستمبر 2026 12:54

جموں (اُردو پوائنٹ اخبارتازہ ترین - اے پی پی۔ 08 ستمبر2026ء) بھارتی پیراملٹری سینٹرل ریزرو پولیس فورس کوغیرقانونی طور پر زیر قبضہ جموں و کشمیر کے اندرونی علاقوں خصوصا جموں ڈویژن کے ادھم پور اور کٹھوعہ اضلاع میں21سٹریٹیجک مقامات پر بھارتی قابض فوج کی معاونت کیلئے تعینات کیاجارہاہے۔کشمیر میڈیا سروس کے مطابق، سی آر پی ایف کو جموں خطے میں فوجی گرڈ کی وسیع تر تنظیم نو کے تحت مذکورہ مقامات پر اپنی آپریشنل موجودگی بڑھانے کی ہدایات کی گئی ہیں۔

ان 21 مقامات کو "انتہائی حساس" قرار دیا گیا ہے۔

(جاری ہے)

سی آر پی ایف اس وقت ان حساس علاقوں میں تعیناتی کا جائزہ لے رہی ہے۔مجوزہ توسیع میں سی آر پی ایف کے سپیشل کمانڈو یونٹ "کوبرا" کو بھی شامل کیا جائے گا۔ منصوبے سے آگاہ ایک فوجی عہدیدارکے مطابق، 9 کوبرا ٹیموں کو ان مقامات پر تعینات کیاجائے گا جبکہ دیگر نو ٹیمیں سکیورٹی ضروریات کے مطابق تربیت حاصل کریں گی۔ان تعیناتیوں کامقصد کنٹرول لائن پر زیادہ توجہ مرکوز کر ناہے، جہاں بھارتی فوج اور بارڈر سکیورٹی فورس کی تعیناتی برقرار ہے۔بھارتی فوج کی راشٹریہ رائفلز کی بھاری نفری مقبوضہ علاقے میں مسلسل تعینات رہے گی، جبکہ سی آر پی ایف منتخب حساس مقامات پر معاونت کرے گی۔