ریڈ زون کی سڑکوں اور اطراف کی تزئین و آرائش، کام تیز کرنے کی ہدایت

کراچی (اُردو پوائنٹ اخبارتازہ ترین - این این آئی۔ 10 ستمبر2026ء) کمشنر کراچی سید حسن نقوی کی زیر صدارت ریڈ زون میں سڑکوں کی مرمت و بحالی، کارپٹنگ اور اطراف کی تزئین و آرائش کے لیے جاری ترقیاتی منصوبوں کا جائزہ اجلاس ہوا، جس میں متعلقہ اداروں کے افسران نے منصوبوں پر پیش رفت کے حوالے سے بریفنگ دی۔اجلاس میں ڈپٹی کمشنر جنوبی جاوید نبی کھوسو، ڈپٹی کمشنر شرقی نصراللہ عباسی، میونسپل کمشنر بلدیہ عظمیٰ کراچی ابرار جعفر، ڈائریکٹر ترقیات نسیم بھٹو، ٹاؤن میونسپل ایڈمنسٹریشن اور دیگر متعلقہ افسران شریک ہوئے۔

اجلاس کو بتایا گیا کہ جاری منصوبوں پر 75 فیصد جسمانی جبکہ 64 فیصد مالی پیش رفت ہوچکی ہے۔ تین اہم سڑکوں کی کارپٹنگ کا کام رواں ماہ کے اختتام تک مکمل کرنے کا ہدف مقرر کیا گیا ہے۔

(جاری ہے)

شاہراہ کمال اتاترک، کورٹ روڈ اور اسٹریچن روڈ پر کارپٹنگ کا کام جاری ہے، جبکہ متعلقہ افسران نے آئندہ 10 روز میں تینوں سڑکوں کا کام مکمل کرنے کی یقین دہانی کرائی۔

اجلاس کو بریفنگ میں بتایا گیا کہ کبوتر چورنگی کی تزئین و آرائش کا کام بھی رواں ماہ مکمل کرلیا جائے گا۔ چورنگی کے لیے تیار کیے گئے ڈیزائن میں مرکزی یادگار کے ساتھ سبزہ شامل کیا گیا ہے، جس کا ابتدائی تخمینہ تقریباً 6 کروڑ روپے ہے اور حکومت سندھ اس ڈیزائن کی منظوری دے چکی ہے۔کمشنر کراچی نے متعلقہ افسران کو ہدایت کی کہ ترقیاتی منصوبوں پر کام کی رفتار مزید تیز کی جائے اور انہیں مقررہ مدت میں مکمل کیا جائے۔

انہوں نے کہا کہ سڑکوں کی بحالی کے ساتھ ہارٹیکلچر اور شہری خوبصورتی کے منصوبوں پر بھی خصوصی توجہ دی جائے۔اجلاس میں نیشنل میوزیم کے اطراف صفائی، ملبہ ہٹانے اور برنس گارڈن کی حالت بہتر بنانے کا فیصلہ بھی کیا گیا۔ بریفنگ میں بتایا گیا کہ میوزیم کے اندر موجود ملبہ ہٹانے کا کام شروع کردیا گیا ہے، جبکہ اسٹریچن روڈ سے متصل برنس گارڈن کے حصے کی بہتری کے لیے بھی اقدامات کیے جا رہے ہیں۔

کمشنر نے منصوبوں کی جسمانی و مالی پیش رفت، اخراجات اور مکمل کیے گئے کام کی تصاویر پر مشتمل تفصیلی چارٹ تیار کرکے پیش کرنے کی ہدایت کی تاکہ مالی ضروریات کے حوالے سے چیف سیکریٹری سندھ کو سفارشات بھیجی جاسکیں۔اجلاس میں کبوتر چورنگی سے برنس روڈ کی جانب جانے والی سڑک کے اطراف قائم ورکشاپس اور دیگر تجاوزات کا بھی جائزہ لیا گیا۔ کمشنر نے ڈپٹی کمشنر اور ٹاؤن میونسپل ایڈمنسٹریشن کو تجاوزات کے خاتمے کے لیے ترجیحی بنیادوں پر اقدامات کرنے کی ہدایت کی۔

سید حسن نقوی نے کہا کہ سڑک کے اطراف قائم ورکشاپس ٹریفک اور شہری آمدورفت میں رکاوٹ کے ساتھ صفائی، خوبصورتی اور سیکیورٹی کو بھی متاثر کر رہی ہیں، اس لیے قانونی کارروائی مکمل کرکے آئندہ کا لائحہ عمل طے کیا جائے۔اجلاس میں تجویز دی گئی کہ ورکشاپس کے خاتمے کے بعد مذکورہ جگہ کو پارکنگ، فٹ پاتھ، روشنی اور پیدل چلنے والوں کے لیے راستے کے طور پر استعمال کیا جاسکتا ہے، جس سے برنس روڈ کو پارکنگ کے دباؤ سے نکالنے اور علاقے کی خوبصورتی میں بہتری لانے میں مدد ملے گی۔فیصلہ کیا گیا کہ بلدیہ عظمیٰ کراچی، ٹاؤن میونسپل ایڈمنسٹریشن اور ضلعی انتظامیہ باہمی رابطے اور مشاورت سے اس حوالے سے جامع منصوبہ تیار کرکے اس پر عملدرآمد کے لیے اقدامات کریں گے۔