پبلک اکاؤنٹس کمیٹی نے ملک میں گندم اور چینی سے متعلق حکومتی پالیسی پر بریفنگ طلب کرلی

اسلام آباد(اُردو پوائنٹ اخبارتازہ ترین - آن لائن۔ 15 ستمبر2026ء) پارلیمان کی پبلک اکاؤنٹس کمیٹی نے ملک میں گندم اور چینی سے متعلق حکومتی پالیسی پر بریفننگ طلب کرلی ۔کمیٹی نے پاسکو کے گوداموں سے گندم چوری کے معاملے پر رپورٹ طلب کرلی ۔منگل کو قائمقام چیئرمین معین عامر پیرزادہ کی زیر صدارت پبلک اکاؤنٹس کمیٹی کا اجلاس منعقد ہوا ۔اجلاس میں نیشنل فوڈ سیکیورٹی کے 186 افسران کو ایک کروڑ اٹھتر لاکھ روپے بونس دینے، گندم خریداری پلان 2024-25 کے کسانوں پر اثرات اور پاسکو کے گوداموں سے گندم چوری کے معاملات زیر بحث آئے۔

اجلاس میں نیشنل فوڈ سیکیورٹی کی جانب سے افسران کو بونس دینے کے معاملے پر رکن کمیٹی شاہدہ اختر علی نے کہا کہ بونس یا اعزازیہ ادارے کے منافع بخش ہونے کی صورت میں ہی دیا جا سکتا ہے۔

(جاری ہے)

چیئرمین کمیٹی معین عامر پیرزادہ نے فنانس ڈویژن کو ہدایت کی کہ سات دن میں جواب جمع کرائے اور اگر ریکوری کی ہدایت کی گئی تو فوری ریکوری کی جائے۔اجلاس میں گندم خریداری پلان 2024-25 کے کسانوں پر اثرات کے معاملے پر آڈٹ حکام نے بتایا کہ پروکیورمنٹ پلان کی وجہ سے کسان متاثر ہوئے۔

جب کم از کم قیمت 3900 روپے فی 40 کلو مقرر کی گئی تو بمپر کراپ آئی لیکن اس وقت گندم کی خریداری نہیں کی گئی۔ آڈٹ حکام نے اس کی تفصیلی انویسٹی گیشن کی سفارش کی۔سیکرٹری نیشنل فوڈ سیکیورٹی نے کہا کہ صوبوں نے خریداری کا اپنا پلان بنایا تھا جبکہ پاسکو کا الگ پلان تھا۔ سینیٹر سلیم مانڈوی والا نے تنقید کرتے ہوئے کہا کہ آپ نے کسان کو بنک کرپٹ کر دیا، اب کسان گندم لگائے گا ہی نہیں۔

انہوں نے بتایا کہ ایک ملین ٹن گندم امپورٹ کرنے کی سمری بن رہی ہے۔ رانا قاسم نون نے اسے نیشنل کرائم قرار دیتے ہوئے کمیٹی بنانے کا مطالبہ کیا۔ رکن کمیٹی سید حسین طارق نے کہا کہ لاکھوں کسانوں نے قرضے لے کر فصل لگائی تھی جنہیں 2200 روپے میں بیچنا پڑا۔ یہ سب نگران حکومت کے دور میں ہوا اور کسی سے کچھ نہیں پوچھا گیا۔ سینیٹر سلیم مانڈوی والا نے کہا کہ آپ نے روپے میں سبسڈی دینی تھی اب ڈالر میں سبسڈی دیں گے اور وزیراعظم کو خط لکھنے کی تجویز دی۔

انہوں نے کہا کہ اگر گندم امپورٹ کرنی ہے تو پرائیویٹ سیکٹر کے ذریعے کی جائے۔ کمیٹی نے گندم اور چینی سے متعلق پالیسی پر بریفنگ لینے کا فیصلہ کیا۔ پاکستان ایگریکلچر سٹوریج اینڈ سروسز کارپوریشن (پاسکو)سے متعلق آڈٹ اعتراضات کے جائزے میں گوداموں سے چوبیس کروڑ روپے کی گندم چوری کا معاملہ بھی سامنے آیا۔ آڈٹ حکام نے بتایا کہ اوکاڑہ، خانپور، حافظ آباد، حیدرآباد اور ڈیرہ الہیار زونز سے گندم چوری ہوئی جو امپورٹڈ گندم تھی۔ سیکرٹری فوڈ سیکیورٹی نے کہا کہ ہم نے اپنے ملازمین کے خلاف انکوائری کی اور کچھ کو نوکری سے نکال دیا۔ چیئرمین پی اے سی نے مکمل تفصیلات طلب کی۔۔۔۔