بحریہ یونیورسٹی میں جاپان کارنر کا افتتاح، جاپانی سفیر کی شرکت

جمعرات 24 ستمبر 2026 17:40

اسلام آباد (اُردو پوائنٹ اخبارتازہ ترین - اے پی پی۔ 24 ستمبر2026ء) بحریہ یونیورسٹی اسلام آباد میں جاپان کارنر کا افتتاح کردیا گیا۔ تقریب میں پاکستان میں جاپان کے سفیر اکاماتسو شوئیچی نے شرکت کی جبکہ اس موقع پر انہوں نے بحریہ یونیورسٹی کے ریکٹر وائس ایڈمرل انجینئر عابد حمید ایچ آئی (ایم) سے بھی ملاقات کی۔بحریہ یونیورسٹی کی جانب سے جاری کردہ معلومات کے مطابق جاپان کارنر یونیورسٹی کی مرکزی لائبریری میں قائم کیا گیا ہے جس کا مقصد طلبہ اور اساتذہ کو جاپان کی ثقافت، معاشرے، تاریخ، تعلیم اور علمی و تحقیقی سرگرمیوں سے روشناس کرانے کے ساتھ ساتھ پاکستان اور جاپان کے درمیان تعلیمی و ثقافتی روابط کو مزید فروغ دینا ہے۔

اس موقع پر جاپانی سفیر نے یونیورسٹی میں بین الاقوامی تعلیمی روابط اور ثقافتی تبادلوں کے فروغ کے لئے اقدامات کو سراہا۔

(جاری ہے)

ملاقات کے دوران پاکستان اور جاپان کے درمیان تعلیم، تحقیق، طلبہ و اساتذہ کے تبادلوں اور دیگر شعبوں میں تعاون کے امکانات پر بھی تبادلہ خیال کیا گیا۔ بحریہ یونیورسٹی کے ریکٹر نے جاپانی سفیر کا خیرمقدم کرتے ہوئے کہا کہ یونیورسٹی عالمی جامعات اور اداروں کے ساتھ روابط کے ذریعے طلبہ کو بین الاقوامی تعلیمی اور ثقافتی تجربات فراہم کرنے کے لئے کوشاں ہے۔

بحریہ یونیورسٹی کے بین الاقوامی امور کے ڈائریکٹوریٹ کے مطابق یونیورسٹی عالمی شراکت داری، تعلیمی تعاون، طلبہ و اساتذہ کے تبادلے اور بین الاقوامی مواقع کو فروغ دینے کے لئے مختلف ممالک کے اداروں کے ساتھ روابط قائم کر رہی ہے۔جاپان کے ساتھ بحریہ یونیورسٹی کے تعلیمی روابط پہلے بھی مختلف سطحوں پر سامنے آ چکے ہیں۔ فروری 2025 میں کیوٹو یونیورسٹی آف ایڈوانسڈ سائنس، جاپان کے بین الاقوامی امور کے ڈائریکٹر کی قیادت میں وفد نے بحریہ یونیورسٹی کا دورہ کیا تھا جس میں طلبہ کے تبادلے، تحقیقی تعاون اور تعلیمی شراکت داری کے امکانات پر تبادلہ خیال کیا گیا تھا۔

جاپان اور پاکستان کے درمیان تعلیمی و ثقافتی روابط دونوں ممالک کے وسیع تر دوطرفہ تعلقات کا اہم حصہ ہیں۔ جاپانی وزارت خارجہ کے مطابق دونوں ممالک کے درمیان مختلف شعبوں میں تعاون اور عوامی سطح پر روابط کے فروغ کے لئے سرگرمیاں جاری ہیں۔