کٹھوعہ میں آپس کی فائرنگ کے واقعے میں دو افسروں سمیت بھارتی فورسزکے چار اہلکار ہلاک

بدھ 30 ستمبر 2026 14:00

جموں(اُردو پوائنٹ اخبارتازہ ترین - این این آئی۔ 30 ستمبر2026ء) غیرقانونی طورپر بھارت کے زیر قبضہ جموں وکشمیر کے ضلع کٹھوعہ میں ایک کیمپ کے اندر آپس کی فائرنگ کے واقعے میں ایک اسسٹنٹ کمانڈنٹ اور ایک سب انسپکٹر سمیت بھارتی پیراملٹری سینٹرل انڈسٹریل سیکیورٹی فورس (سی آئی ایس ایف) کے چار اہلکارہلاک ہو گئے۔کشمیر میڈیا سروس کے مطابق بھارتی حکام نے بتایا کہ یہ واقعہ شام تقریباً ساڑھے سات بجے بسوہلی کے علاقے ماشکا میں سیوا تھری پن بجلی منصوبے پر پیش آیا۔

سی آئی ایس ایف کے اہلکار منصوبے کی حفاظت پر مامور تھے۔اطلاعات کے مطابق ہیڈ کانسٹیبل ابھی دیش کمار نے اپنے ساتھیوں کے ساتھ تلخ کلامی کے بعد اپنی سروس رائفل سے فائرنگ کر دی۔حکام نے بتایا کہ فائرنگ کے نتیجے میں سی آئی ایس ایف کے چار اہلکار شدید زخمی ہوئے اور بعد میں قریبی اسپتال میں زخموں کی تاب نہ لاتے ہوئے دم توڑ گئے۔

(جاری ہے)

ہلاک ہونے والوں کی شناخت اسسٹنٹ کمانڈنٹ انکت کمار پانڈے، سب انسپکٹر لکشمن سنگھ اور کانسٹیبل رفیق احمد اور سندیپ کمار کے طور پر ہوئی ہے۔

حکام کے مطابق فائرنگ کے بعد ابھی دیش کمار کو گرفتار کیا گیا۔ واقعے میں استعمال ہونے والا ہتھیار بھی قبضے میں لے لیا گیا ہے۔حکام نے بتایا کہ سی آئی ایس ایف اور پولیس کے اعلیٰ افسران فوری طور پر جائے وقوعہ پر پہنچ گئے، جبکہ تلخ کلامی اور اس کے بعد فائرنگ کا باعث بننے والی وجوہات کا تعین کیا جا رہا ہے۔واضح رہے کہ مقبوضہ جموں و کشمیر میں بھارتی فورسز کے اہلکاروں میں خودکشی اور آپس میں فائرنگ کے واقعات اکثر ہوتے رہتے ہیں جو ان کو درپیش مشکل حالات اور شدیدذہنی دباؤ کی عکاسی کرتے ہیں۔

ماہرین کا کہنا ہے کہ سیاسی طور پر کشیدہ اور جنگی ماحول میں طویل عرصے تک تعیناتی،اپنے اہلخانہ سے مسلسل دوری، چھٹی نہ ملنے اور سخت آپریشنل حالات کے باعث فورسز اہلکار شدید ذہنی اور جسمانی دباؤ کاشکار ہیں۔ان کا کہنا ہے کہ بھارتی فورسز کے اہلکاروں کو معمول کی سکیورٹی ڈیوٹی کے علاوہ امن و امان کو برقراررکھنے، انتخابی ڈیوٹی، سکیورٹی انتظامات اور عسکریت پسندی سے نمٹنے کے لئے طویل تعیناتیوں سمیت مختلف نوعیت کی ذمہ داریاں سونپی جاتی ہیں۔ کام کے دباؤ، اعلیٰ افسران کی جانب سے ناروا سلوک اور تذلیل اور اپنے پیاروں سے مسلسل دوری کو بھی ذہنی دباؤ بڑھنے کا باعث قراردیا جاتا ہے۔