آؤٹ آف کنٹرول ہورہی ہیں‘، جیا علی کی ہانیہ عامر پر تنقید، اداکارہ کا ردعمل بھی آگیا

منگل 6 اکتوبر 2026 22:14

ًکراچی (اُردو پوائنٹ اخبارتازہ ترین - آن لائن۔ 06 اکتوبر2026ء) اداکارہ اور سابق ماڈل جیا علی نے معروف اداکارہ ہانیہ عامر کے بارے میں گفتگو کرتے ہوئے ان کے رویے پر تنقید کی ہے جس پر ہانیہ عامر نے بھی سوشل میڈیا پر طنزیہ انداز میں جواب دے دیا۔جیا علی نے حال ہی میں ایک ٹی وی پروگرام میں شرکت کی جہاں ان سے ہانیہ عامر اور درِفشاں سلیم میں سے کسی ایک اداکارہ کا انتخاب کرنے کو کہا گیا۔

جیا علی نے ہانیہ عامر کا انتخاب کرتے ہوئے انہیں بہترین اداکارہ اور پاکستان کا چہرہ قرار دیا تاہم ساتھ ہی ان کے رویے پر تبصرہ کرتے ہوئے کہا کہ ہانیہ عامر ’آؤٹ آف کنٹرول‘ ہورہی ہیں۔اداکارہ کا کہنا تھا کہ ہانیہ عامر ایک باصلاحیت فنکارہ ہیں اور پاکستان کی نمائندگی کرتی ہیں اس لیے انہیں اپنے رویے کا بھی خیال رکھنا چاہیے۔

(جاری ہے)

جیا علی کے اس بیان پر ہانیہ عامر نے بھی سوشل میڈیا پر مختصر مگر طنزیہ ردِعمل دیا۔

انہوں نے جیا علی کے الفاظ دہراتے ہوئے لکھا ’آؤٹ آف کنٹرول ہوگئی۔‘دونوں اداکاراؤں کے درمیان اس مختصر تبادلے نے سوشل میڈیا صارفین کی توجہ حاصل کرلی جہاں جیا علی کے بیان پر صارفین کی آرا منقسم دکھائی دیں۔کچھ صارفین نے جیا علی کے مؤقف کی حمایت کرتے ہوئے کہا کہ وہ ہانیہ عامر کے حوالے سے درست بات کررہی ہیں جبکہ ہانیہ عامر کے مداحوں نے اپنی پسندیدہ اداکارہ کا دفاع کیا۔