بھارت نے اسلحہ کی عالمی تجارت کو بلند ترین سطح پر پہنچایا، ہتھیاروں کی عالمی درآمدات میں صرف بھارت کا حصہ 13 فیصد ہے،رپورٹ

منگل 21 فروری 2017 17:11

لندن۔ (اُردو پوائنٹ اخبار آن لائن۔ بدھ 22 فروری 2017ء)عالمی سطح پرہتھیاروں کی خریدو فروخت کے بارے میں ایک سالانہ رپورٹ میں کہا گیا ہے کہ سرد جنگ کے خاتمے کے بعد گزشتہ پانچ سال کے دوران عالمی سطح پر ہتھیاروں کی منتقلی کاحجم بلند ترین سطح پر پہنچ گیا ہے۔ کشمیرمیڈیا سروس کے مطابق سٹاک ہوم انٹرنیشنل پیس ریسرچ انسٹی چیوٹ نے پیر کو جاری کی گئی اپنی رپورٹ میں کہا ہے کہ مشرق وسطیٰ کے ممالک نے ہتھیاروں کی درآمد تقریباً دوگنی کردی ہے جبکہ ہتھیاروں کی عالمی درآمدات میں صرف بھارت کا حصہ 13فیصد ہے۔

رپورٹ میں کہاگیا ہے کہ زیادہ تر ہتھیار 2012ء سی2016ء کے درمیان خریدے گئے جو 1990ء کے بعد پانچ سالہ مدت میںسب سے زیادہ ہیں۔ ایشیاہتھیار درآمد کرنے والا اہم خطہ ہے اور بھارت نے عالمی درآمدات کا 13فیصد اپنے نام کرکے علاقائی حریفوں چین اور پاکستان کو پیچھے چھوڑدیا ہے۔

(جاری ہے)

بھارت نے زیادہ تر ہتھیار روس سے خریدے ہیں۔امریکہ اور روس نے مجموعی عالمی درآمدات کا آدھا حصہ فراہم کیا ہے جبکہ چین ، فرانس اور جرمنی بھی بڑے برآمد کنند گان میں شامل ہے۔

سٹاک ہوم انٹرنیشنل پیس ریسرچ انسٹی چیوٹ میں ہتھیاروں اور فوجی اخراجات پروگرام کے بارے میں سینئر محققSiemon Wezeman نے کہاکہ تخفیف اسلحہ کا کوئی علاقائی نظام موجود نہ ہونے کی وجہ سے ایشیائی ممالک نے اپنے اسلحہ خانوں میں توسیع کا عمل جاری رکھا۔ انہوں نے کہا چین ہتھیاروں کی درآمد کے متبادل کے لیے اپنی مصنوعات تیار کرنے کے قابل ہے جبکہ بھارت ہتھیار فراہم کرنے والے ممالک روس، امریکہ، یورپی ممالک، اسرائیل اور جنوبی کوریا کی اسلحہ ٹیکنالوجی کا محتاج ہے۔