لاہورچیمبر نے وفاقی وزیر خزانہ محمد اورنگزیب کو بجٹ تجاویز پیش کر دیں

لاہور (اُردو پوائنٹ اخبارتازہ ترین - این این آئی۔ 07 مئی2026ء) لاہور چیمبر آف کامرس اینڈ انڈسٹری کے صدر فہیم الرحمن سہگل نے وفاقی وزیر خزانہ محمد اورنگزیب سے ملاقات کی اور آئندہ مالی سال کے لیے لاہور چیمبر کی بجٹ تجاویز پیش کیں۔ ان تجاویز میں صنعتوں کی بحالی، برآمدات میں اضافہ، ٹیکس اصلاحات اور کاروبار کی لاگت کم کرنے پر زور دیا گیا۔

وفاقی وزیر خزانہ نے لاہور چیمبر کی جانب سے پیش کی گئی جامع تجاویز کو سراہا اور کہا کہ کاروباری برادری کے مسائل اجاگر کرنے میں لاہور چیمبر اہم کردار ادا کر رہا ہے۔ انہوں نے ڈائریکٹر جنرل ٹیکس پالیسی آفس ڈاکٹر نجیب احمد میمن کو ہدایت کی کہ لاہور چیمبر کی تجاویز کا تفصیلی جائزہ لیا جائے۔ملاقات کے دوران وزیر خزانہ نے بتایا کہ فیڈرل بورڈ آف ریونیو میں ڈیجیٹلائزیشن کے عمل کو پاکستان ریونیو آٹومیشن لمیٹڈ (پی آر اے ایل) کے ذریعے مزید مضبوط بنایا جا رہا ہے۔

(جاری ہے)

ان کا کہنا تھا کہ ان اصلاحات کا مقصد انسانی مداخلت کم کرنا، ٹیکس دہندگان کو سہولت فراہم کرنا اور ملک میں کاروباری ماحول کو بہتر بنانا ہے۔محمد اورنگزیب نے مزید کہا کہ چیمبرز آف کامرس اور کاروباری برادری سے مشاورت کا عمل باقاعدگی سے جاری رکھا جائے گا تاکہ معاشی پالیسی سازی میں تمام متعلقہ فریقوں کی مؤثر شمولیت یقینی بنائی جا سکے۔

صدر لاہور چیمبر فہیم الرحمن سہگل نے وزیر خزانہ کی جانب سے کاروباری برادری سے مسلسل رابطے اور اہم معاشی و ٹیکس معاملات پر اعتماد میں لینے کے عمل کو سراہا۔ انہوں نے کہا کہ حکومت اور نجی شعبے کے درمیان مسلسل مشاورت کاروباری اعتماد کی بحالی، صنعتی ترقی اور پائیدار معاشی استحکام کے لیے ضروری ہے۔لاہور چیمبر کی بجٹ تجاویز میں کہا گیا کہ بار بار ایس آر اوز کے اجرا اور ٹیکس قوانین کی مختلف تشریحات سے پالیسیوں میں عدم استحکام پیدا ہو رہا ہے، جو صنعتوں کی بندش اور ڈی انڈسٹریلائزیشن کی بڑی وجہ ہے۔

چیمبر نے مطالبہ کیا کہ کاروبار کرنے کی لاگت کم کی جائے جو اس وقت خطے کے دیگر ممالک کے مقابلے میں 22 سے 30 فیصد زیادہ ہے۔چیمبر نے مختلف صنعتوں کے لیے علیحدہ ٹیرف اسٹرکچر متعارف کرانے کی تجویز دی تاکہ مقامی صنعتوں کو تحفظ دیا جا سکے۔ برآمد کنندگان کے لیے سادہ اور قابل پیش گوئی فائنل ٹیکس رجیم (ایف ٹی آر) بحال کرنے اور تاجروں کے لیے فکسڈ ٹیکس نظام متعارف کرانے کا مطالبہ بھی کیا گیا تاکہ ٹیکس نیٹ کو وسیع کیا جا سکے۔

دیگر تجاویز میں ٹیکس ریفنڈز کی بروقت ادائیگی اور تاخیر کی صورت میں معاوضہ دینے، مینوفیکچررز اور کمرشل امپورٹرز کے درمیان ودہولڈنگ ٹیکس کے فرق کو کم کرنے، کم منافع والے شعبوں کے لیے سیکشن 113 میں ترمیم اور سیکشن 7E کا جائزہ لینے کی سفارش شامل تھی تاکہ دستاویزی سرمایہ کاری کی حوصلہ افزائی ہو سکے۔لاہور چیمبر نے فاٹا اور پاٹا سمیت تمام علاقوں میں یکساں ٹیرف اور ٹیکس نظام نافذ کرنے، ایڈوانس ٹیکسز کو مرحلہ وار ختم کرنے اور ٹیکس وصولی کو سیلز کے مرحلے پر منتقل کرنے کی تجویز بھی دی۔

اس کے علاوہ ایکسپورٹ فیسیلیٹیشن اسکیم (EFS) کی مؤثر نگرانی کے لیے ریئل ٹائم ڈیٹا شیئرنگ اور پوسٹ کلیئرنس آڈٹ کا مطالبہ کیا گیا۔لاہور چیمبر نے برآمدات میں ڈائیورسفیکیشن لانے، ویلیو ایڈڈ اور کیپیٹل گڈز سیکٹرز کی حمایت، صنعت سے منسلک ووکیشنل ٹریننگ پروگرامز کے ساتھ ہنگامی بنیادوں پر تربیتی اقدامات، آئی ٹی اور ڈیجیٹل سروسز کے فروغ، اسٹیٹ بینک اصلاحات کے ذریعے تھرڈ کنٹری ٹریڈ کو سہولت دینے اور پیک شدہ ڈیری و گوشت کی مصنوعات پر 18 فیصد سیلز ٹیکس کے خاتمے پر بھی زور دیا۔