متحدہ عرب امارات نے انٹری پرمٹ قوانین میں سختی کردی

ویزہ درخواست کے ساتھ پاسپورٹ کے کور پیج کی کاپی جمع کرانا لازمی قرار

ساجد علی جمعرات 25 ستمبر 2025 15:32

متحدہ عرب امارات نے انٹری پرمٹ قوانین میں سختی کردی

دبئی ( اُردو پوائنٹ اخبارتازہ ترین۔ 25 ستمبر 2025ء ) متحدہ عرب امارات کی جانب سے انٹری پرمٹ قوانین کو سخت کردیا گیا۔ خلیج ٹائمز کے مطابق متحدہ عرب امارات کے داخلے کے اجازت نامے کے لیے درخواست دینے والوں کو اب اپنے پاسپورٹ کے بیرونی کور پیج کی کاپی بھی جمع کرانا ہوگی، جس کو گزشتہ ہفتے سے ضروریات میں شامل کیا گیا ہے، اس حوالے سے ٹریول ایجنسیوں سے متعلقہ اداروں کو اطلاعات موصول ہوئی ہیں جس کی روشنی میں اب ویزہ کی درخواست کے ساتھ بیرونی کور پیج بھی اپ لوڈ کیا جارہا ہے۔

بتایا گیا ہے کہ اب تمام انٹری پرمٹ درخواستوں کے لیے پاسپورٹ کے بیرونی کور پیج کو منسلک کرنا لازمی ہے جو کہ فوری طور پر نافذ العمل ہے، اب سے انٹری پرمٹ کے لیے درخواست دینے والوں کو اپنے پاسپورٹ کی کاپی، پاسپورٹ کے سائز کی واضح تصویر، ہوٹل کی بکنگ کی تصدیق، راؤنڈ ٹرپ ٹکٹ کی کاپی اور پاسپورٹ کے بیرونی کور پیج کی کاپی لازمی جمع کرانا ہوگی۔

(جاری ہے)

آمر سینٹر کے ایک اور ایگزیکٹو نے تصدیق کی ہے کہ ان کی تنظیم کو گزشتہ ہفتے اس بارے میں مطلع کرنے والی ای میل موصول ہوئی، اس کے بعد سے ہم سسٹم پر تمام وزٹ ویزوں اور دیگر داخلے کے اجازت ناموں کے لیے بیرونی پاسپورٹ کور پیج اپ لوڈ کر رہے ہیں کیوں کہ اب اس کے بغیر داخلہ پرمٹ حاصل کرنا ممکن نہیں ہے، تاہم ابھی تک یہ واضح نہیں ہے کہ ترمیم کیوں کی گئی ہے۔

کچھ ٹریول ماہرین کا کہنا ہے کہ اس سے حکام کو الجھن دور کرنے میں مدد ملے گی کیوں کہ بعض اوقات کچھ درخواست دہندگان غلط قومیت دیتے ہیں، کچھ پاسپورٹس کے لیے قومیت کا پتہ لگانا تھوڑا مشکل ہوتا ہے کیوں کہ یہ واقعی چھوٹے حروف میں لکھا جاتا ہے، پاسپورٹ کا کور پیج ہونے سے ابہام دور ہو جائیں گے اور حکام کو درخواست گزار کی قومیت کا آسانی سے پتہ لگانے میں مدد ملے گی۔