چمن میں دھماکا،ایک شخص جاں بحق، 10سے زائد زخمی

چمن(اُردوپوائنٹ اخبارتازہ ترین۔12 اگست 2018ء) :چمن میں ڈی پی او آفس کے قریب دھماکا ہوگیا، جس کے نتیجہ میں ایک شخص جاں بحق اور 10 سے زائد زخمی ہوگئے، زخمیوں میں ایک بچہ بھی شامل ہے۔ میڈیا رپورٹس کے مطابق چمن میں مال روڈ پرزیر تعمیر ڈی پی او آفس کی بلڈنگ کے قریب دھماکا ہوا ہے۔ اطلاعات کے مطابق دھماکے میں ایک شخص جاں بحق اور ایک بچے سمیت 10 افراد زخمی ہوگئے ہیں۔

سکیورٹی ذرائع کے مطابق دھماکے کی شدت اتنی زیادہ تھی کہ دھماکے کی آواز دور تک سنی گئی اور قریبی عمارتیں لرز کر رہ گئیں۔دہشتگرد دھماکے سے علاقے میں مقیم لوگوں میں خوف وہراس پھیل گیا۔دھماکے کے فوری بعد سکیورٹی فورسز نے علاقے کو گھیرے میں لے لیا ۔ جبکہ علاقے کے داخلی و خارجی راستوں اور حساس مقامات کی سکیورٹی بھی سخت کردی گئی ہے۔

(جاری ہے)

سکیورٹی فورسز نے جائے دھماکا پر دھماکے کی نوعیت جاننے کیلئے تفتیش شروع کردی ہے۔

دوسری جانب ریسکیو ٹیموں نے دھماکے میں زخمی ہونے والے افراد کو اسپتال منتقل کردیا ہے۔ چمن میں دہشتگرد دھماکے کی نگراں وزیراعظم ، وزراعلیٰ سمیت سیاسی جماعتوں کے قائدین نے مذمت کی ہے۔ واضح رہے سکیورٹی اداروں نے عیدالضحیٰ کے موقع پر تمام مساجد اوراہم رہنماؤں کی سکیورٹی بھی سخت کردی ہے۔ عید الضحیٰ پر امن وامان کو برقرار رکھنے کیلئے تمام سکیورٹی وسائل بروئے کار لائے جارہے ہیں۔

بتایا جارہا ہے کہ نماز عیدین کے اوقات میں ملک بھر میں موبائل فون سروس معطل بھی کی جاسکتی ہے۔ تاہم ابھی موبائل فو سروس معطل کرنے کا فیصلہ نہیں کیا گیا ہے۔ عیدالضحیٰ کے پیش نظر رویت ہلال کمیٹی کا آج کراچی میں اجلاس ہوا ہے۔ اجلاس میں ذوالحجہ کا چاند دیکھنے کے لیے مرکزی رویت ہلال کمیٹی نے کاروائی شروع کردی ہے۔