پاکستانیوں کی حفاظت کو یقینی بنانے کے لیے کرغز حکومت کے ساتھ رابطہ میں ہیں، ترجمان دفترخارجہ

اسلام آباد (اُردو پوائنٹ اخبارتازہ ترین - اے پی پی۔ 18 مئی2024ء) حکومت پاکستان کر غز جمہوریہ میں فسادات کے پیش نظر پاکستانی شہریوں کی حفاظت اور سلامتی کو یقینی بنانے کے لیے کر غز حکومت کے ساتھ رابطے میں ہے۔کر غز حکام نے گزشتہ رات بشکک میں پاکستانیوں سمیت غیر ملکی شہریوں کے خلاف تشدد کے واقعات پر افسوس کا اظہار کیا ہے اور انکوائری کرانے اور قصورواروں کو سزا دینے کا بھی وعدہ کیا ہے۔

ترجمان دفتر خارجہ کی جانب سے ہفتہ کو جاری بیان کے مطابق پاکستانی سفارت خانہ نے ہنگامی ہیلپ لائنز کھول دی ہیں اور طلباء اور ان کے اہل خانہ کے سوالات کے جوابات دیے ہیں جبکہ جمہوریہ کرغزستان میں پاکستان کے سفیر حسن علی ضیغم اعلیٰ کر غز حکام کے ساتھ قریبی رابطہ میں ہیں۔ کرغزستان کی وزارت صحت کے مطابق چار پاکستانیوں کو ابتدائی طبی امداد فراہم کر کے فارغ کر دیا گیا جبکہ ایک پاکستانی جبڑے کی چوٹ کے باعث زیر علاج ہے۔

(جاری ہے)

ڈائریکٹر جنرل (ای سی او اور سی اے آرز) اعزاز خان نے کر غز سفارت خانہ کےناظم الامور میلس مولدالیف کو دفتر خارجہ طلب کرکے احتجاجی مرسلہ دیااور انہیں کرغز جمہوریہ میں زیر تعلیم پاکستانی طلباء کے خلاف گزشتہ رات کے واقعات پر حکومت پاکستان کی گہری تشویش سے آگاہ کیا ۔ کرغزستان کے ناظم الامور نے کہا ہے کہ کر غز حکومت کو پاکستانی طلباء اور کرغز جمہوریہ میں مقیم شہریوں کے تحفظ کو یقینی بنانے کے لیے ہر ممکن اقدامات کرنے چاہییں۔

بیان میں کہا گیا ہے کہ حکومت پاکستان دنیا بھر میں اپنے ہم وطنوں کے تحفظ اور سلامتی کے معاملے کو بہت سنجیدگی سے لیتی ہے اور اپنے ہم وطنوں کی فلاح و بہبود کو یقینی بنانے کے لیے تمام ضروری اقدامات کرے گی۔نائب وزیراعظم اور وزیر خارجہ اسحاق ڈار نے دفتر خارجہ کو صورتحال پر نظر رکھنے اور پاکستانی شہریوں کی مکمل مدد اور سہولت فراہم کرنے کی ہدایت کی ہے۔