حکومت کی جانب سے معشیت کے استحکام اورغیرملکی سرمایہ کاروں کے اعتماد کی بحالی کیلئے اٹھائے جانیوالے اقدامات کے نتائج سامنے آنا شروع ہوگئے ہیں، ترجمان وزارت خزانہ

جمعہ 18 اکتوبر 2019 15:44

اسلام آباد (اُردو پوائنٹ اخبارتازہ ترین - اے پی پی۔ 18 اکتوبر2019ء) وزارت خزانہ کے ترجمان عمرحمیدخان نے کہاہے کہ حکومت کی جانب سے معشیت کے استحکام اورغیرملکی سرمایہ کاروں کے اعتماد کی بحالی کیلئے اٹھائے جانیوالے اقدامات کے نتائج سامنے آنا شروع ہوگئے ہیں ۔جمعہ کو سماجی رابطوں کی ویب سائیٹ ٹوئٹر پر جاری پیغام میں انہوں نے کہاکہ معشیت کے استحکام اور غیرملکی سرمایہ کاروں کے اعتماد کی بحالی کیلئے حکومت نے جو اقدامات کئے ہیں ان کے مثبت نتائج ملناشروع ہوگئے ہیں اورملک میں براہ راست بیرورنی سرمایہ کاری کے حوالہ سے جاری اعدادوشمارسے بھی اس کی تصدیق ہوگئی ہے۔

انہوں نے کہاکہ ستمبر کے مہینے میں ملک میں براہ راست غیرملکی سرمایہ کاری کے حجم میں 112 فیصد اضافہ ہوا جو گزشتہ 26 مہینوں کی بلند ترین سطح ہے،مالی سال کی پہلی سہ ماہی میں ملک مین براہ راست غیرملکی سرمایہ کاری کے حجم میں 137 فیصد اضافہ ہوا۔

(جاری ہے)

سٹیٹ بنک آف پاکستان کی طرف سے جاری تازہ ترین اعدادوشمارکے مطابق مالی سال کی پہلی سہ ماہی میں ملک میں بیرونی سرمایہ کاری کاحجم 886.6 ملین ڈالر رہا، گزشتہ مالی سال کے اس عرصہ میں ملک میں بیرونی سرمایہ کاری کا حجم 374.1 ملین ڈالر رہاتھا۔اعدادوشمارکے مطابق مالی سال کی پہلی سہ ماہی میں غیرملکی نجی سرمایہ کاری کا حجم 564.8 ملین ڈالر ریکارڈ کیا گیا جو گزشتہ مالی سال کے اسی عرصہ کے مقابلے میں 51 فیصد زیادہ ہے۔