این ایچ اے حالیہ طوفانی بارشوں اور سیلاب میں اپنے روڈ نیٹ ورک کو ٹریفک کے لئےفعال رکھنے کے لئے تمام وسائل بروئے کار لا رہا ہے، ترجمان این ایچ اے

اسلام آباد (اُردو پوائنٹ اخبارتازہ ترین - اے پی پی۔ 19 اپریل2024ء) حالیہ شدید بارشوں اور سیلاب کے دنوں میں این ایچ اے انتظامیہ سڑکوں پر ٹریفک کو بحال رکھنے میں مصروف عمل ہے۔ ترجمان نیشنل ہائی وے اتھارٹی کی طرف سے جمعہ کو جاری بیان کے مطابق چیئرمین این ایچ اے ارشد مجید مہمند کی ہدایات پر نیشنل ہائی وے اتھارٹی کی تمام توانائیاں اور وسائل سڑکوں کی بحالی پر صرف کئے جا رہے ہیں، ملک کے بیشتر حصوں میں این ایچ اے نیٹ ورک ٹریفک کےلئے بحال ہے۔

اس حوالے سے ملک بھر میں حساس مقامات پر این ایچ اے کا عملہ اور مشینری مصروف عمل ہے۔ شاہراہِ قراقرم پر چند مقامات لینڈ سلائیڈنگ کے سبب بند ہیں ، پاک فوج کی مدد سے لینڈ سلائیڈنگ کا ملبہ صاف کیا جا رہا ہے، شاہراہ جلد ہر قسم کی ٹریفک کے لئے بحال ہو جائے گی۔

(جاری ہے)

گلگت بلتستان میں گیتی داس سے زیرو پوائنٹ (چلاس ) کے مقام سے برف ہٹائی جارہی ہے جبکہ گلگت بلتستان کی بقیہ سڑکیں ٹریفک کے لئے کھلی ہیں ۔

اسی طرح خیبر پختونخوا میں بیشتر شاہراہیں ٹریفک کے لئے بحال کی جا چکی ہیں ۔ کاغان- گیتی داس کے مقام پر شدید برف باری کے باعث سڑک ہر قسم کی ٹریفک کے لئے بند ہو چکی ہے۔ برف ہٹانے کا کام موسم کی شدت کم ہونے پر شروع کیا جائے گا۔شمالی اور جنوبی بلوچستان میں این ایچ اے روڈ نیٹ ورک پر ٹریفک معمول کے مطابق رواں دواں ہے۔ روڈ انفراسٹرکچر کو بہترین حالت میں رکھنے کے لئے این ایچ اے کے تمام علاقائی دفاتر میں کنٹرول رومز قائم کر دئیے گئے ہیں جہاں گردونواح کی موسمی اور شاہراتی صورتحال کی لمحہ بہ لمحہ معلومات کی مانیٹرنگ کی جارہی ہے۔

صورتحال کے مطابق اعلیٰ حکام ہدایات جاری کر رہے ہیں ۔اس سلسلے میں عوام سے اپیل کی جاتی ہے کہ غیر ضروری طور پر خطرے سے دوچار علاقوں کی طرف سفر سے گریز کریں۔ این ایچ اے خراب موسمی حالات میں اپنے روڈ نیٹ ورک کو بحال رکھنے کےلئے تمام ضروری اقدامات کر چکا ہے ، افسران اور فیلڈ عملےکی چھٹیاں منسوخ کر دی گئی ہیں ۔