وزارت موسمیاتی تبدیلی این ڈی ایم اے کے تعاون سے گلوف تھری پروجیکٹ کا آغاز

اسلام آباد (اُردو پوائنٹ اخبارتازہ ترین - این این آئی۔ 22 مئی2024ء) وزیر اعظم کی کوآرڈینیٹر برائے موسمیاتی تبدیلی اور ماحولیاتی رابطہ رومینہ خورشید عالم نے کہا ہے کہ وہ پاکستان کے برفانی آبی وسائل کے تحفظ کے لیے گلوف تھری پراجیکٹ کا آغاز کرنے جا رہی ہیں۔ وزیر اعظم کی کوآرڈینیٹر برائے موسمیاتی تبدیلی اور ماحولیاتی رابطہ کی چیئرمین این ڈی ایم اے لیفٹیننٹ جنرل انعام حیدر ملک HI(M) سے ملاقات کے دوران اس بات پر اتفاق کیا گیا۔

اس منصوبے پر این ڈی ایم اے اور وزارت موسمیاتی تبدیلی مشترکہ طور پر کام کریں گے۔ دونوں وزرتوں کی جانب سے ملک میں گرمی کی لہروں، قدرتی آفات اور آنے والے سیلابوں پر قریبی تعاون کا اعادہ کیا اور آئندہ سیلاب کے دوران جنگلی حیات کے خطرے سے دوچار انواع کو بچانے کے لیے مشترکہ حکمت عملی بنانے کا بھی فیصلہ کیا گیا۔

(جاری ہے)

چیئرمین این ڈی ایم اے اور وزیر اعظم کی کوآرڈینیٹر برائے موسمیاتی تبدیلی رومینہ خورشید عالم نے بھی آئندہ COP29 پر تفصیلی تبادلہ خیال کیا اور اس بات پر اتفاق کیا گیا کہ دونوں فریقین باکو میں ہونے والے اقوام متحدہ کے آئندہ عالمی سربراہی اجلاس کے لیے رپورٹس، دستاویزی فلموں، سفارشات کی تیاری کے لیے مشترکہ تعاون کریں گے۔

وزیر اعظم کے کوآرڈینیٹر نے COP29 کے صدر اور آذربائیجان کے وزیر ماحولیات اور قدرتی وسائل مختار بابائیف نے COP29 کے لیے پاکستان کے تعاون، عزم اور تکنیکی مدد کے بارے میں اعلیٰ ترین خدمات سے بھی آگاہ کیا۔ وزیر اعظم کے کوآرڈینیٹر نے چیئرمین این ڈی ایم اے کی تجویز سے بھی اتفاق کیا کہ این ڈی ایم اے اور ایم او سی سی کی جانب سے طویل المدتی پائیدار ترقیاتی منصوبوں کے لیے مشترکہ پروجیکٹ بینک قائم کیا جائے اور بار بار اٹھائے جانے والے اقدامات سے بچا جا سکے۔