ایشیائی ترقیاتی بنک قابل قدرشراکت دار ہے،واپڈا نے منصوبوں کی تکمیل میں بنک کی معاونت سے بہت استفادہ کیا ہے، جنرل(ر) سجاد غنی

اسلام آباد (اُردو پوائنٹ اخبارتازہ ترین - اے پی پی۔ 23 مئی2024ء) چیئرمین واپڈا انجینئر لیفٹیننٹ جنرل(ر) سجاد غنی نے کہا ہے کہ ایشیائی ترقیاتی بینک قابل قدرشراکت دار ہے،منصوبوں کی تکمیل میں بنک کی معاونت سے بہت استفادہ کیا ہے، باہمی شراکت کو بڑے اور تزویراتی منصوبوں تک بڑھانا چاہتے ہیں۔ واپڈا سے جاری اعلامیہ کے مطابق ان خیالات کااظہارانہوں نے واپڈاہائوس میں ایشیائی ترقیاتی بنک کے وفدسے گفتگوکرتےہوئے کیا۔

ملاقات میں واپڈا منصوبوں کی فنانسنگ بارے تبادلہ خیال کیاگیا۔اس موقع پر ممبر فنانس، جنرل منیجر (پراجیکٹس)ساؤتھ اور واپڈا کے مختلف منصوبوں کے پراجیکٹ ڈائریکٹرز ، جنرل منیجر(کوآرڈی نیشن اینڈ مانیٹرنگ)، جنرل منیجرفنانس (واٹر /پاور)، ایڈوائزر (ہائیڈرو ریسورس مینجمنٹ) اور ایڈوائزر (ہائیڈرو پلاننگ) بھی موجود تھے۔

(جاری ہے)

اس موقع پر بریفنگ دی گئی جس میں بتایاگیا کہ پاکستان میں پن بجلی پیدا کرنے کی صلاحیت 70 ہزار میگاواٹ ہے۔

واپڈا کے 22 پن بجلی گھر ہیں، جن کی مجموعی پیداواری صلاحیت 9 ہزار 459میگاواٹ ہے۔واپڈا کے زیر تعمیر پن بجلی منصوبے 2025 سے 2028-29 تک مرحلہ وار مکمل ہوں گے، جن کی تکمیل پر کم و بیش 10ہزار میگاواٹ مزید ماحول دوست اور کم لاگت بجلی حاصل ہوگی اور واپڈا کی پن بجلی پیدا کرنے کی صلاحیت تقریباً دوگنا ہوجائے گی۔ نیشنل گرڈ میں کم لاگت پن بجلی کی موجودہ شرح 29 فی صد ہے، واپڈا اِسے 2030 تک40 فی صد اور 2050تک 50 فی صد تک بڑھانے کے لئے پُرعزم ہے۔

وفد کو ایشیائی ترقیاتی بنک کی معاونت سے زیر تعمیر نولانگ ڈیم،کرم تنگی ڈیم کے دوسرے مرحلے اورپٹن ہائیڈرو پاور پراجیکٹ پر پیش رفت کے حوالے سے بھی آگاہ کیا گیا۔ وفد کو مہمند ڈیم، دیا مر بھاشا ڈیم اور کیال خواڑ پراجیکٹ سمیت زیر تعمیر اور مستقبل قریب میں شروع کئے جانے والے منصوبوں میں مالی معاونت کے لئے بھی بریفنگ دی گئی۔ممبر فنانس نے وفد کو واپڈا کی مالی حکمت عملی کے نمایاں خدو خال سے آگاہ کیا۔

اُنہوں نے کہا کہ واپڈا عالمی بنک سمیت بین الاقوای مالیاتی اداروں کے لئے مستحکم تکنیکی اور مالی ساکھ کا حامل ادارہ ہے۔ اس موقع پر چیئرمین نے اپنے خیر مقدمی کلمات میں ایشیائی ترقیاتی بینک کو قابل قدر شراکت دار قرار دیتے ہوئے کہا کہ واپڈا نے اپنے منصوبوں کی تکمیل میں بنک کے مالی تعاون سے بہت زیادہ استفادہ کیا ہے۔ اُنہوں نے کہا کہ لوگوں کی سماجی اور معاشی ترقی کے ساتھ ساتھ واپڈا پراجیکٹس ماحولیاتی تبدیلی کے اثرات میں کمی لانے اور ماحول دوست پن بجلی کی پیداوار جیسے تزویراتی مقاصد کے حصول میں بھی نمایاں کردار ادا کرتے ہیں۔

چیئرمین نے تجویز پیش کی کہ ایشیائی ترقیاتی بنک واپڈا منصوبوں میں اپنی شراکت کو درمیانے درجے کے منصوبوں سے بڑے اور تزویراتی اہمیت کے حامل منصوبوں تک بڑھائے۔وفد نے واپڈا کو ایک مستحکم حیثیت کا حامل ادارہ قرار دیااورواپڈاکے آنے والے منصوبوں میں فنانسنگ کو فروغ دینے میں گہری دلچسپی کا اظہار کیا۔