یتیم کے سرپردست شفقت رفاقت رسولؐ اور جنت کا حصول بھی ہے،محمد حسین محنتی کا آغوش گلشن معمار کا دورہ

آغوش سینٹر کو مثالی ادارہ اور بچوں کی مثالی ومعیاری تعلیم وتربیت کا اہتمام کیا جائے،امیرجماعت اسلامی سندھ

منگل 28 ستمبر 2021 22:57

کراچی (اُردو پوائنٹ اخبارتازہ ترین - این این آئی۔ 28 ستمبر2021ء) جماعت اسلامی سندھ کے امیر محمد حسین محنتی نے الخدمت کے تحت گلشن معمار کراچی میں قائم آغوش سینٹر کا دورہ کیا، کوآرڈینیٹر عنایت اللہ اسماعیل نے خوش آمدید کہا اور پروجیکٹ کے متعلق بریفنگ دیتے ہوئے بتایا کہ 20 کروڑ کی لاگت سے قائم ہونے والے آغوش سینٹر میں ابتدائی طور پر50بچوں سے آغاز کیا جا رہا ہے ،فی بچے کی تعلیم وتربیت اوررہائش پر ماہانہ 12000ہزاراکے اخراجات ہوں گے۔

ملک بھر میں الخدمت کے تحت یتیم بچوں کے لیے یہ15واں سینٹر ہے جہاں کے بچے نمایاں کامیابیاں حاصل کر رہے ہیں۔محمد حسین محنتی نے آغوش کے تعمیراتی کام اور مختلف شعبہ جات کا دورہ کرنے کے موقع پر منتظمین پر زور دیا کہ آغوش سینٹر گلشن معمار کو ایک مثالی ادارہ بناکر بچوں کی مثالی ومعیاری تعلیم وتربیت کا اہتمام کیاجائے۔

(جاری ہے)

الخدمت کے تحت اہل خیر حضرات کے تعاون سے قائم ہونے والا آغوش سینٹر ایک اہم کارنامہ اور قابل تحسین قدم ہے کیونکہ یتیم بچے کے سر پر دست شفقت رکھنا رفاقت رسولؐ اور جنت کا حصول بھی ہے۔

انہوں نے کہ کہاکہ انسانیت کی خدمت خاص طور پر مجبور و بے سہارا لوگوں کی مدد اوریتیم بچوں پر شفقت رب کی رضا کا بھترین ذریعہ ہے۔جماعت اسلامی کے تحت کراچی کے علاوہ ہالا مٹیاری میں بھی آغوش سینٹر بنا رہی ہے جس کاکام بھی آخری مرحلہ میں داخل ہے۔