وفاقی محتسب اعجاز احمد قریشی اور چیف سیکرٹری سندھ سید آصف حیدر شاہ کی مشترکہ سربراہی میں جیل اصلاحات کے متعلق اہم اجلاس

کراچی (اُردو پوائنٹ اخبارتازہ ترین - اے پی پی۔ 23 مئی2024ء) وفاقی محتسب اعجاز احمد قریشی اور چیف سیکرٹری سندھ سید آصف حیدر شاہ کی مشترکہ سربراہی میں جیل اصلاحات کے متعلق اہم اجلاس سندھ سیکریٹریٹ میں منعقد ہواجس میں صوبے کے جیلوں کی مجموعی صورتحال کا جائزہ لیا گیا۔جمعرات کو جاری کردہ اعلامیہ کے مطابق اجلاس میں چیف سیکریٹری سندھ سید آصف حیدر شاہ نے کہا کہ صوبہ سندھ کی تمام جیلوں میں اصلاحات لائی جارہی ہیں، اصلاحات کے لیے محکمہ تعلیم، صحت، سوشل ویلفیئر اور سول سوسائٹی کام کررہی ہیں۔

انہوں نے کہا کہ جیل اصلاحات کے تحت اوور سائٹ کمیٹیاں بھی تشکیل دی گئی ہیں، اوور سائٹ کمیٹیوں میں عدلیہ، سول سوسائٹی، تعلیم و صحت کے ماہرین اور مخیر افراد شامل ہیں۔ انہوں نے کہا کہ سندھ کے تمام جیلوں میں آڈیو اور وڈیو لنک سسٹم لگایا جائے گا جس سے قیدیوں کی ملاقاتیں اور کورٹ میں پیشی بھی وڈیو لنک کے زریعے ممکن ہوگی۔

(جاری ہے)

انہوں نے کہا کہ کراچی میں نئی جیل کی تعمیر کے لئے 500ایکڑ زمین بھی جلد مختص کی جائے گی۔

چیف سیکریٹری سندھ سید آصف حیدر شاہ اجلاس میں مزید کہا کہ قیدیوں کو معیاری کھانا فراہم کرنے کہ لئے بجیٹ 1200 ملین سے بڑھا کر 2400 ملین کیا گیا ہے۔ صوبے کے 22 جیلوں کے لئے 22 اوورسائیٹ کمیٹیاں تشکیل دی گئی ہیں۔ جیلوں میں 2824 قیدیوں کو پرائمری تاں ماسٹرز کی تعلیم اور ووکیشنل کورسز کروائے جا رہے ہیں۔ کراچی سینٹرل جیل میں عورت قیدیوں کو گوگل اور ایمیزون کے ڈجیٹل کورسز بھی کروائے جا رہے ہیں۔اجلاس میں وفاقی محتسب اعجاز احمد قریشی نے سندھ حکومت کی جیل اصلاحات کو سراہتے ہوئے کہا کہ سندھ میں جیل اصلاحات اور قیدیوں کی سہولت کے لئے اچھا کام ہوا ہے۔ اجلاس میں انوار حیدر سینئر ایڈوائزر محتسب، سیکریٹری صحت، آئی جی جیل سمیت محکمہ داخلہ سمیت متعلقہ افسران نے شرکت کی۔