وزیر اعلی پنجاب کے سموگ کنٹرول پروگرام کے تحت کسانوں میں جدید زرعی آلات کی تقسیم کیلئے قرعہ اندازی کا انعقاد

قصور (اُردو پوائنٹ اخبارتازہ ترین - این این آئی۔ 17 مئی2024ء) وزیر اعلی پنجاب مریم نوازشریف کے کسان دوست ماحول دوست منصوبہ کے تحت سموگ کنٹرول پروگرام کو عملی جامعہ پہنانے کیلئے کسانوں میں جدید زرعی آلات کی تقسیم کیلئے قرعہ اندازی کا انعقاد ڈی سی کمیٹی روم میں منعقد ہوا۔ جس میں چیئر مین وزیر اعلی مانیٹرنگ کمیٹی حاجی نعیم صفدر انصاری ، ڈپٹی کمشنر محمد ارشد بھٹی ، ایڈیشنل ڈپٹی کمشنر جنرل محمد جعفر چوہدری ، ممبر پنجاب بار کونسل ملک ریاض احمد خاں ، ڈپٹی ڈائریکٹر زراعت حافظ طاہر نعیم ، اسسٹنٹ ڈائریکٹر زراعت ڈاکٹر محمد وقاص ،محکمہ زراعت کے افسران اور کسانوں کی کثیر تعداد نے شرکت کی ۔

اس موقع پر بتایا گیا کہ وزیر اعلی پنجاب کی جانب سے انسداد سموگ کنٹرول پروگرام کے تحت سپر سیڈ رز /پاک سیڈرز کی فراہمی کیلئے ضلع کے 463کسانوں نے درخواستیں جمع کروائیں جن میں سے 315درخواستوں کو منظور کیا گیا جبکہ 148درخواستیں نامکمل ہونے کی وجہ سے منسوخ کر دی گئیں تا ہم ضلع کا ٹارگٹ 292مقرر کیا گیا تھا۔

(جاری ہے)

اسی طرح رائس سٹرا شریڈرز کی فراہمی کیلئے 35درخواستیں موصول ہوئیں جن میں سے 30کو مظور کیا گیا جبکہ 5نامکمل ہونے کی وجہ سے منسوخ کی گئیں تا ہم ضلع کا ٹارگٹ 44مقرر کیا گیا تھا۔

تمام کسانوں کی منظور شدہ درخواستوں کی شفاف قرعہ اندازی کے بعد سپر سیڈر اوررائس سٹرا شریڈرز کی الاٹمنٹ کی گئی اور بہت جلد کامیاب کسانوں میں یہ جدید زرعی آلات تقسیم کئے جائینگے ۔اس موقع پرچیئر مین وزیر اعلی مانیٹرنگ کمیٹی حاجی نعیم صفدر انصاری اور ڈپٹی کمشنر محمد ارشد بھٹی نے کامیاب خوش نصیب کاشتکاروں کو مبارکباد دی اور کہا کہ وزیر اعلیٰ پنجاب مریم نواز شریف کے ویژن کے مطابق زرعی ترقی اور کاشتکاروں کی خوشحالی کیلئے تاریخی اقدامات اٹھائے جا رہے ہیں۔

60فیصد سبسڈی کے تحت ضلع کے 322کاشتکاروں میں سپر/پاک سیڈر اور رائس سٹرا شریڈرز فراہم کئے جارہے ہیں تاکہ مشینی زراعت کو فروغ حاصل ہو سکے اور کاشتکاروں کی پیداواری لاگت میں کمی واقع ہو۔انھوں نے کہا کہ سپر سیڈرز اور رائس سٹرا شریڈرز کی فراہمی سے سموگ کو کنٹرول کرنے میں مدد ملے گی اور فصلوں کی باقیات کی تلفی جدید زرعی مشینری سے استعمال سے ممکن ہو سکے گی۔ڈپٹی کمشنر محمد ارشد بھٹی نے کہا کہ جدید مشینری کی فراہمی سے کاشتکاروں کے وقت اور لیبر کی بچت ہونے کے ساتھ ساتھ پیداواری لاگت میں بھی کمی واقع ہو گی۔