لوگوں کو بلا معاوضہ اور فوری ریلیف فراہم کرنا ہماری اولین ترجیح ہے، ایڈوائزر وفاقی محتسب

پشاور (اُردو پوائنٹ اخبارتازہ ترین - اے پی پی۔ 25 اپریل2024ء) وفاقی محتسب ریجنل دفتر پشاور کے ایڈوائزر انچارج بادشاہ گل وزیر نے کہا ہے کہ لوگوں کو بلا معاوضہ اور فوری ریلیف فراہم کرنا ہماری اولین ترجیح ہے اور گزشتہ سال وفاقی حکومت کے محکموں کے خلاف موصول ہونے والی 10,389 شکایات کے مقابلے میں 10,386 شکایات کا ازالہ کیا گیا ہے۔وفاقی حکومت کے اداروں/کارپوریشنز کے خلاف درج شکایات میں عوام کو فوری اور بلا معاوضہ ریلیف فراہم کرنا اور گڈ گورننس، دیانتداری، انصاف پسندی و شفافیت کو فروغ دینا ہمارا اولین مشن ہے۔

بادشاہ گل وزیر نے اے پی پی سے بات کرتے ہوئے کہا کہ ان کے دفتر نے وفاقی حکومت کی آرگنائزیشن کے خلاف درج کی گئی شکایات پر تیزی سے کارروائی کی ہے اور 73.8 فیصد سے زیادہ کامیابی کے تناسب کے ساتھ 5,201 فیصلوں کو کامیابی سے نافذ کیا ہے ،عوام کو ان کی دہلیز پر فوری انصاف فراہم کرنے کے لئے وفاقی محتسب کا دفتر 24 جنوری 1983 کو قائم کیا گیا تھا اور بعد ازاں اس کا علاقائی دفتر خیبر پختونخواہ (اس وقت این ڈبلیو ایف پی) میں 1985 میں قائم کیا گیا تھا۔

(جاری ہے)

انہوں نے کہا کہ بعد میں اس کے علاقائی دفاتر پشاور، ڈی آئی خان اور ایبٹ آباد میں قائم کیے گئے، اس کے علاوہ وانا جنوبی وزیرستان اور صدہ کرم قبائلی اضلاع میں شکایات وصولی کے مراکز قائم کیے گئے۔انہوں نے کہا کہ پشاور کے دفتر کو پشاور، مردان، کوہاٹ، کرم اور اورکزئی ڈویژنوں سے موصول ہونے والی شکایات کا فیصلہ کرنے کا حکم دیا گیا ہے اور یہ کہ کسی بھی سرکاری محکمے کے خلاف شکایات رکھنے والا کوئی بھی شخص ذاتی طور پر یا آن لائن شناختی کارڈ، موبائل نمبر، پتہ اور نام کے ساتھ سادہ درخواست جمع کرا سکتا ہے۔

محکمہ کی جانب سے درخواستوں پر اسپاٹ آرڈرز بھی جاری کیے گئے۔پبلک سیکٹر کے محکموں کی مبینہ بے ضابطگیوں اور بدانتظامی کے خلاف درج کی گئی شکایات کو 60 دنوں کے اندر حل کیا جا رہا ہے اور ہمارے نتائج کو وفاقی محتسب آفس، اسلام آباد کے ساتھ بھی شیئر کیا جا تاہے۔بادشاہ گل وزیر نے کہا کہ آگاہی مہم کو خیبر پختونخوا کے تعلیمی اداروں تک بڑھا دیا گیا ہے اور وہ جلد ہی اسلامیہ کالج پشاور کا دورہ کریں گے تاکہ طلبا کو وفاقی محتسب آفس کے کاموں اور ذمہ داریوں سے آگاہ کیا جا سکے۔ انہوں نے کہا کہ آن لائن سہولت کے بعد وفاقی محتسب آفس پر عوام کے اعتماد میں اضافہ ہوا ہے اور ان کے دروازے سب کے لیے کھلے ہیں۔