بلوچستان کی ترقی میں نوجوان نسل کو شامل کرنا چاہئے،سرفراز بگٹی

کوئٹہ(اردو پوائنٹ اخبارتازہ ترین۔16 مئی 2024) وزیراعلیٰ بلوچستان سرفراز بگٹی کا کہنا ہے کہ بلوچستان کی ترقی میں نوجوان نسل کو شامل کرنا چاہئے،فاصلوں کو ڈائیلاگ اور گڈ گورننس سے کم کیا جاسکتا ہے،ریاست مذاکرات کیلئے تیار ہے لیکن دوسری جانب سے ہمارے مذاکرات پر کوئی مثبت پیغام نہیں آرہا ، بلوچستان میں صحت اور تعلیم کے نظام کو بگاڑ دیا گیا۔

تقریب سے خطاب کرتے ہوئے وزیراعلیٰ بلوچستان نے کہا کہ ترقی میں پیچھے رہنے کا یہ سلسلہ ہماری اپنی وجہ سے ہے کیونکہ ہم نے وقت کے ساتھ چلنے کی کوشش نہیں کی۔پورا پاکستان کہتا ہے بلوچستان کا مسئلہ طاقت سے نہ حل کیا جائے، اب بھی ریاست بار بار مذاکرات اور بات کرنے کیلئے تیار ہے۔ اگر بات کرنے سے معاملات ٹھیک ہوجائیں تو اس سے بڑی بات کیا ہوسکتی ہے۔

(جاری ہے)

ہم نے اپنے معاملات کو خود ٹھیک کرنا ہے۔باہر سے کوئی بھی ہمارے معاملات کو ٹھیک کرنے نہیں آئیگا۔ پاکستان کے قیام کی افغانستان نے مخالفت کی تھی۔ لاہور سے کوئی پنجابی وزیراعلیٰ نہیں آیا، ہم بلوچستان کے لوگ اس کے ذمہ دار ہیں، ہم تاریخ وہاں سے شروع کرتے ہیں جہاں سے آدھا سچ بتایا جاتا ہے۔وزیراعلیٰ بلوچستان سرفراز بگٹی کا مزید کہنا تھا کہ یہاں بسوں سے اتار کوبے گناہ لوگوں کو مارا جاتا ہے۔

یہ کونسی بلوچی روایات ہیں۔ ان روایات کی نہ توہمارا آئین اجازت دیتا ہے نہ ہی ہمارا اسلام اس بات کی اجازت دیتا ہے کہ ہم کسی بے گناہ کی جان لیں۔ اس دہشت گردی کو روکنے کیلئے بات چیت کا راستہ اپنانے کا کہا جاتا ہے۔ نوجوانوں کے لئے تربیتی پروگرام اور قرضوں کا پروگرام دے سکتے ہیں۔ وہ آپ کا ملک وائلنس کے ذریعے توڑنا چاہتے ہیں،آپ بتائیں اس دہشتگردی کو روکنے کا طریقہ کیا ہے؟نوکریوں کی فروخت میں جو بھی ملوث ہے اس کو سزا دی جائے۔