بشریٰ بی بی کا احتساب عدالت کے جج پر عدم اعتماد

راولپنڈی (اُردو پوائنٹ اخبارتازہ ترین - این این آئی۔ 17 مئی2024ء) راولپنڈی اڈیالہ جیل میں بانی پی ٹی آئی کے خلاف 190 ملین پانڈ ریفرنس کی سماعت کے موقع پر بشریٰ بی بی نے احتساب عدالت کے جج پر عدم اعتماد کا اظہار کردیا۔بشریٰ بی بی نے سماعت کے آغاز میں احتساب عدالت کے جج پر عدم اعتماد کیا تاہم بانی پی ٹی آئی، وکلا اور بشریٰ بی بی کی طویل مشاورت کے بعد عدم اعتماد واپس لے لیا گیا۔

190 ملین پانڈ ریفرنس کی سماعت میں آج کسی گواہ کا بیان ریکارڈ نہیں ہوا۔بانی پی ٹی آئی کے خلاف 190 ملین پانڈ ریفرنس کی سماعت 22 مئی تک ملتوی کردی گئی۔اس سے قبل بشری بی بی غصے میں کمرہ عدالت داخل ہوئیں، وہ بانی پی ٹی آئی کے پاس جانے کے بجائے الگ بیٹھی رہیں اور کمرہ عدالت میں بانی پی ٹی آئی کی بہنوں سے بھی نہیں ملیںکمرہ عدالت میں داخل ہونے کے تھوڑی دیر بعد بشریٰ بی بی غصے میں روسٹرم پر گئیں اور کہا کہ پہلے کیسز کے ججز پر بھی اعتماد نہیں تھا، اس عدالت پر بھی عدم اعتماد کر رہی ہوں۔

(جاری ہے)

بشریٰ بی بی نے جج سے کہا کہ 15مئی کو اڈیالہ جیل میں سماعت تھی، کسی نے نہیں بتایا۔عدالت کے مطابق15 مئی کی سماعت تو ملتوی ہوئی تھی۔بشریٰ بی بی نے کہا کہ میں اس کیس میں قیدی نہیں ہوں، نا انصافی کی وجہ سے جیل میں ہوں۔بعدازاں بانی پی ٹی آئی اپنی جگہ سے اٹھ کر بشری بی بی کے ساتھ روسٹرم پر کھڑے ہوئے اور انہیں فیملی کارنر میں چلنے کو کہا۔بشریٰ بی بی بانی پی ٹی آئی کی بہنوں کے ساتھ بیٹھی اپنی بیٹیوں سے بھی نہیں ملیں، علیحدہ کمرے کے انتظام کے بعد وہ اپنی بیٹیوں سے علیحدگی میں ملیں۔

بانی پی ٹی آئی سماعت کی ابتدا سے آخر تک پریشان نظر آئے، وہ کبھی وکلا، کبھی روسٹرم، کبھی بشریٰ بی بی اور کبھی بہنوں کے پاس جاتے رہے۔بشریٰ بی بی اور بانی پی ٹی آئی نے پانچ سے چھ مرتبہ سرگوشیوں میں باتیں بھی کیں۔ وکلا اور بانی پی ٹی آئی نے عدالت سے بشریٰ بی بی کو قائل کرنے کیلئے تین مرتبہ وقت بھی مانگا۔عدالت نے وکلا اور بانی پی ٹی آئی کی درخواست پر سماعت میں تین بار وقفہ کیا اور طویل مشاورت کے بعد وکلا اور بانی پی ٹی آئی نے عدم اعتماد واپس لینے سے عدالت کو آگاہ کیا۔