Self Grooming Shandar Hai - Article No. 3398

روحی حمید
ایک بزرگ شاعر، جمیل ادیب سید کی نظم کے اشعار ہیں کہ ”وہ رانی روپ کی، جس کا ہمیشہ روپ رہے․․․․وہ جس کے سامنے ہر روز پھیکی دھوپ رہے․․․․․وہ جس کے چہرے پہ لگتا ہے صبح ٹھیر گئی․․․․بہار جس کے لئے رنگ سب بکھیر گئی․․․․وہ جس کو اہلِ نظر کھویا کھویا چاند کہیں․․․․وہ جس کے آگے سدا چاندنی کو ماند کہیں․․․․․دراصل کیا ہے کہ ”خوبصورت ہونا اور خوبصورت نظر بھی آنا دو یک سر مختلف باتیں ہیں۔“ اپنے فطری حسن کی دیکھ ریکھ، خود کو جاننا، سمجھنا، شخصی خوبیاں اُجالنا، موسم، موقع محل اور اپنے قد بُت، روپ رنگ سے عین ہم آہنگ زیب و زینب، آرائش و زیبائش کا انتخاب ہر ایک کے بس کی بات نہیں۔کم ہی لوگ خود آگہی و خود شناسی کے فن سے مالا مال ہوتے ہیں، اک عمر گزر جاتی ہے اور خود سے بیگانگی کا یہ عالم ہوتا ہے کہ اکثر دوسرے ہی لوگ بتاتے ہیں کہ آپ پر یہ رنگ، یہ انداز جچتا ہے۔

(جاری ہے)

آئینہ تک جھوٹ بولے جاتا ہے اور ناواقفانِ حال اُسے سچ مان کر ایک طویل عرصہ ایک ہی ڈگر، روش پر چلتے ہی چلتے چلے جاتے ہیں۔اور․․․․پھر کبھی سیلف گرومنگ کے اشتیاق میں یا کبھی کسی اسٹائلسٹ، ماہر مشاطہ سے مڈ بھیڑ کی صورت اچانک ہی منکشف ہوتا ہے کہ آج تک سولہ سنگھار کے نام پہ جو بھی ہار سنگھار کیا گیا، وہ تو فطری حسن، اصل شخصیت سے لگا ہی نہیں کھاتا تھا۔جو رنگ و انداز آج تک اختیار کیے گئے، وہ تو در حقیقت ہمارے لئے تھے ہی نہیں۔تب ہی تو ”میک اوور“ کی (کسی کو مکمل طور پر تبدیل کر دینا، خاص طور پر اُس کا ہیئر اسٹائل، ملبوسات اور میک اپ وغیرہ کا انداز) اصطلاح یا فن رواج پایا۔اور عمومی طور پر یہ میک اوور شخصیت کے حق میں فائدہ مند، شاندار ہی ثابت ہوتا ہے۔دور حاضر کے دیگر ہزارہا کمالات و محاسن کے ساتھ ایک خوبی یہ بھی ہے کہ آج ہر ایک نہ سہی، تو کم از کم ہر تیسرا، چوتھا شخص ”سیلف گرومنگ“ کے فن سے بہت حد تک آشنا ہو چلا ہے، جبکہ اس ضمن میں خواتین کی شرح تو کہیں بلند ہے۔