ساہیوال،ڈسٹرکٹ ہیڈکوارٹر ہسپتال میں ڈاکٹروں کی غفلت سے 24گھنٹے میں 6مریض ہلاک ، وارڈ میں پانی اور بجلی کی عدم دستیابی پر مریض خوار، ورثاء کا شدید احتجاج

ساہیوال(اُردو پوائنٹ اخبار تازہ ترین۔آئی این پی۔11جنوری۔2013ء) ڈسٹرکٹ ہیڈکوارٹر ہسپتال ساہیوال کے وارڈ میڈیکل نمبر2میں ڈاکٹروں کی غفلت سے 24گھنٹے میں 6مریض ہلاک ہوگئے، رات کو تین مریض جاں سے ہاتھ دھو بیٹھے ، وارڈ میں پانی اور بجلی کی عدم دستیابی پر مریض خوار، ورثاء کا شدید احتجاج ۔ تفصیلات کے مطابق جمعرات کی صبح 7بجے سے جمعہ کی7بجے تک 24گھنٹوں کے دوران چھ مریض عبدالمجید65سالہ ماڈل ٹاؤن ساہیوال، مہتاب 70سالہ نور شاہ، نور بی بی 70سالہ کوٹ خادم علی شاہ، نواب بی بی60سالہ 37ای بی سید نذر محی الدین فریدٹاؤن50سالہ اور فریحہ کوٹ دیوائل18سالہ ہلاک ہوگئے ، وارڈ کے سپیشلیسٹ 24گھنٹے میں صرف ایک گھنہ دس بجے آئے ہیں اور باقی سارا ٹائم اپنے کلینک پر مریضوں کو بلا کر بڑی بڑی فیسوں سے علاج کیاجاتا ہے ۔

(جاری ہے)

رات کو جب وارڈ کے سپیشلیسٹ کو بلایاگیا تو وہ موبائل سائلنٹ پر لگا کرسوئے رہے اور رات کوتین مریض ہلاک ہوگئے ۔ جب سپیشلیسٹ کو کال دی گئی وہ تحریری کال کے باوجود نہ آئے اور اہل جوئنیئر کئی وارڈوں میں اکیلا ڈیوٹی دیتا رہا۔ اس دوران کئی مرتبہ بجلی گئی۔ گیس کا کنکشن منقطع تھا۔ جنریٹر تیل کی بچت کا بہانہ بنا کر نہ چلایاگیا۔ وارڈ میں بجلی پانی اور گیس کی بندش کے سبب مریض خوار ہوتے رہے ۔شہریوں نے حکومت پنجاب سے فوری مداخلت کی اپیل کی اور مطالبہ کیا کہ غفلت کے مرتکب ہسپتال کے میڈیکل سپرٹنڈنٹ اور ذمہ دار سپشلیسٹ کو معطل کرکے ہسپتال کے وارڈ کی حالت درست کی جائے ۔