نواز شریف کی سربراہی میں ن لیگ کااجلاس، معاملات کو افہام و تفہیم سے سلجھانے پر اتفاق

اتوار 17 اگست 2014 16:19

رائے ونڈ(اُردو پوائنٹ اخبار تازہ ترین۔17اگست۔2014ء) وزیر اعظم نواز شریف کی مشاورتی ملاقات میں آزادی مارچ اور انقلاب مارچ کی قیادت کے ساتھ معاملات کو افہام و تفہیم سے سلجھانے پر اتفاق کیا گیا ہے۔ خورشید شاہ اور سراج الحق کے رابطوں کے نتائج کو حتمی فیصلے میں سامنے رکھا جائے گا۔رائے ونڈ لاہور میں وزیر اعظم میاں محمد نواز شریف نے پارٹی کے سینئر رہنماوں سے اسلام آباد کی صورتحال پر مشاورت کی ہے ۔

مشاورتی ملاقات میں وزیر اعلیٰ پنجاب شہباز شریف ، وزیر خزانہ اسحاق ڈار ، حمزہ شہباز اور پنجاب سے تعلق رکھنے والے پارٹی کے سینئر قریبی رہنما شریک ہوئے ۔ مشاورت میں آزادی اور انقلاب مارچ اور اسلام آباد میں جاری دھرنوں پر تبادلہ خیال کیا گیا جبکہ حکومتی آپشنز بھی اس ملاقات میں زیر غور ائے ۔

(جاری ہے)

ذرائع کے مطابق مشاورت میں طے کیا گیا کہ حتمی فیصلہ کرتے وقت اپوزیشن لیڈر خورشید شاہ اورامیر جماعت اسلامی سراج الحق کے رابطوں کے نتائج کو سامنے رکھا جائے گا جبکہ گورنر پنجاب اور گورنر سندھ کی کاوشوں کے نتیجے میں سامنے آنے والی تجاویز کا بھی جائزہ لیکر حکومتی آپشنز فائنل کیے جائیں گے ۔

مشاورتی ملاقات میں یہ امر کھل کر سامنے آیا ہے کہ حکومت معاملات کو افہام تفہیم سے سلجھانا چاہتی ہے ۔ذرائع کے مطابق پارٹی نے رہنمائوں نے مشاورتی ملاقات کے بعد بتایا کہ وزیر اعظم نے مشورہ سب سے کر لیا ہے مگر حتمی فیصلہ اسلام آباد جا کر کریں گے اور وفاقی وزراء کی قریبی ٹیم سے بھی مشاورت کی جائے گی۔