امریکی ریاست میں بارشوں کا 1000سالہ ریکارڈ ٹوٹ گیا،سیلاب اور طوفانی بارش سے 11 افراد ہلاک

کولمبیا(اُردو پوائنٹ اخبار تازہ ترین۔ 06 اکتوبر۔2015ء ) امریکی ریاست کیرولائنا میں بارشوں کا 1000سالہ ریکارڈ ٹوٹ گیا، سیلاب اور طوفانی بارش سے 11 افراد ہلاک ہوگئے ۔غیر ملکی میڈیا کے مطابق جنوبی امریکی ریاست کیرولائنا کی گورنر نکی ہیلے کہا ہے کہ ان کی ریاست میں حالیہ ہونے والی طوفانی بارشوں نے ریاست میں بارش کا 1000 سالہ ریکارڈ ٹوٹ گیا ہے جبکہ سیلاب اور طوفانی بارش سے اب تک 11 افراد ہلاک ہوچکے ہیں۔

نیشنل ویدر سروس کا کہنا ہے کہ گزشتہ جمعرات سے ریاست کے مختلف شہروں میں 36 سینٹی میٹر تک بارش ہوئی جو ریاست کی تاریخ میں بارشوں کا نیا ریکارڈ ہے۔امریکی میڈیا کے مطابق حالیہ بارشوں کے باعث ہلاک ہونے والے 11 افراد میں سے 4 ٹریفک حادثات جبکہ 7 ڈوبنے کی وجہ سے ہلاک ہوئے۔

(جاری ہے)

بارش سے سب سے زیادہ متاثر ہونے والے ریاستی دارالحکومت کولمبیا میں صحافیوں سے بات کرتے ہوئے گورنر نکی ہیلے کا کہنا تھا کہ حالیہ ریکارڈ بارشوں نے تقریباً 26 ہزار افراد کو بجلی اور 40 ہزار کو پینے کے پانی جیسی بنیادی سہولت سے محروم کردیا ہے۔

شدید بارش کے باعث ریاست کی متعدد سڑکیں اور پل ٹریفک کے لیے بند کر دیئے گئے ہیں جبکہ بارش میں پھنسے افراد کو کشتیوں اور ہیلی کاپٹرز کے ذریعے محفوظ مقامات پر منتقل کیا جارہا ہے تاہم ہزاروں افراد اب بھی امداد کے منتظر ہیں۔کولمبیا کے میئر اسٹیو بن یامن کا کہنا تھا کہ شدید بارش کے باعث شہر کے 9 ڈیم مکمل طور پر بھر چکے ہیں اور ان میں پانی ذخیرہ کرنے کی مزید گنجائش نہیں ہے۔شہریوں کی مدد کے لیے امداد کے عالمی ادارے ریڈ کراس نے ریاست بھر میں 30 پناہ گاہیں قائم کی ہیں جہاں شہریوں کو منتقل کیا جارہا ہے۔امریکی صدر باراک اوباما نے ریاست کے کئی علاقوں کو آفت زدہ قرار دیتے ہوئے امداد کا اعلان کیا ہے۔